Ubhodla umlilo owekilabhu elaxazwe nguProf Ngubane
SIBHODLA umlilo isikhulu seDurban FC egijima kwiSouth African Football Association (Safa) KwaZulu-Natal ABC Motsepe League ngokushiywa ngumqeqeshi.
UGian Chidoni oyisikhulu esiphezulu kwiDurban FC, uzwakalise ukungenami ngesenzo sikaMlungisi “Professor” Ngubane ( osesithombeni) sokudinsila umsebenzi ikilabhu ingalindele. Nakuba ecikekile uChidoni kodwa uthi ukhona ozoqhubeka nokucija ikilabhu ngesikhathi besathungatha ozovala isikhala sikaNgubane.
“Yimbi le nto ayenzile kodwa kumele siqhubekele phambili nezinhlelo zekilabhu. Ngeke sijahe ukulanda omunye umqeqeshi. Umuntu esizomqasha kumele siqikelele ukuthi ungena khaxa kusikompilo lwekilabhu,” kusho uChidoni.
UNgubane ukhale ngokuhola amakinati kwiDurban FC. Uthi ubefana nesihambi esikwelinye izwe ngaphandle kwamaphepha asivumela ukusebenza khona, esigcina sesamukela noma yini. Uthi useqalile kwiMbabane Highlanders FC yaseSwaziland egijima kwiligi enkulu yakuleliya lizwe.
Kuzo ezeMotsepe League, iKwaDukuza FC ibambane kwathula umoya noMvoti FC kuba ngu-1-1 ngoMgqibelo eStanger High School. Igoli leKwaDukuza FC libekwe enethini nguMenzi “Sguda” Madela kwathi eloMvoti FC leza noThobani “Mdevu” Mthembu.
IMilford FC ishaye i-Edendale Juventus ngo-2-1 ngoMgqibelo eMhlathuze Sports Complex. Amagoli eMilford aqotshelwe enethini nguNgcebo “Ndlela” Zulu noMlungisi Khumalo.
I-Ashley United iwole amaphuzu ekuhambeni ishaya iDrakensburg FC ngo2-0 ngoMgqibelo eMgungundlovu. Amagoli e-Ashley ashaywe nguMuzi “Muh” Mshengu noS’bonelo “Mthiyane” Khuboni.
IMaritzburg City ibambane neGWP Friends kuba ngu-1-1 ngoMgqibelo eWadley Stadium, eMgungundlovu. Igoli leCity lishaywe nguXolani Mhlongo kwathi elokulinganisa leGWP lashaywa nguThabo Meko.
Umdlalo weKwaMashu All Stars neSummerfield Dynamos kawubanga khona ngenxa yemvula. Lo mdlalo bekumele ugijinywe ngoMgqibelo ntambama eMakhehleni. Kuthiwa isimo sezulu senze wahlehliswa. ISummerfield ibiye kulo mdlalo seyigabe ngoClaude Tarin obekwiGWP Friends oseyiphini likaFalcon Rose ongumqeqeshi wale kilabhu ezinze eChatsworth.
Isiyonke imiphumela yemidlalo yeSafa KZN ABC Motsepe League imi kanje: Ladysmith Utd 1, Natal Utd 2; Wanderers 6, Dbn FC 1; Milford 2, Edendale 1; KwaDukuza 1, uMvoti 1; Drakensburg 0, Ashley 2; Pmb City 1, GWP 1.