ABAFUNDI MABAZIMISELE NGEMFUNDO YABO
MHLELI: Mangicoshe leli thuba ngokuzithoba okukhulu ngizwakalise ilaka lami kubafundi bonke ababhala izivivinyo zokuphela konyaka, ikakhulukazi abenza uGrade 12 KwaZulu-Natal.
Nginxusa abafundi ukuba bazinike isikhathi esanele sokubheka izincwadi zabo, bamise kancane ubumnandi banamathele ngokuzikhandla ezincwadini zabo.
Nginxusa nabazali ukuba babaxhase abantwana babanikeze uthando.
Abafundi mabazi ukuthi sekumele bayofunda ukuzimela manje balungiselele ukuya ezikhungweni zemfundo ephakeme ngonyaka ozayo, abangaphumelelanga bavuke bazithintithe, balwele ukuthola isicucu ngoba eNingizimu Afrika kunzima ukuthola umsebenzi uma ungenalo iphepha esandleni.
Ngidlulisa amazwi enduduzo kubo bonke othisha nabafundi abadlule emhlabeni nonyaka. Kubafundi bonke bakaGrade 12, bakulezi zikole esengike ngazivakashela okuyiZenzeleni High School eMbazwana, yiQhubinyathi Secondary school, iTheo Hlalanathi High, yiPhezukomkhono High school, yiNdukwende High school, yiMa- gwababa High School naseHlophe High school, ngifisa ukuba konke abakufunde unyaka uqala bazinike ithuba lonke lokubheka izincwadi zabo baphinde bakhuleke kuThixo ngaphambi kokuba babhale.
Ngibanxusa ukuba bafundisise yonke imiyalelo ebhalwe ephepheni, bangajahi ukuqeda kuqala bashiye izikhala ngoba kugcono ukuzama kunokushiya izikhala.
Ngiyathemba ukuthi nesibalo sabafundi abazophumelela nonyaka sizokhula kakhulu ukuze siphakamise igama lesifundazwe sakithi. Ngibonge kubo bonke othisha abebezinikela ukuncelisa abantwana ngolwazi, ngibafisela ukuphumula okuhle njengoba sekuzovalelwa uZibandlela (December).
Ngibonga kakhulu kothisha abebedela amaholide abo bengaphumuli, belwela ukuphumelelisa ikusasa labafundi bakithi nanokubambisana phakathi kwezinyunyana zothisha, abazali abengamele izikole, umnyango wezemfundo, abaqaphi abebeqapha izikole, othishanhloko bezikole bonke nabafundi, nginifisela ukuba uThixo anibusise kuze kube wunyaka ozayo.