Kumenyezelwe abazomela iSA kweye-IAAF
I-ATHLETICS South Africa (ASA) imemezele isikwati sabasubathi abazomela iNingizimu Afrika kwiInternational Association of Athletics Federation (IAAF) World Indoor Championships azoqala mhla lulunye kuNdasa (March) asongwe zizine eBirmingham, e-England.
Elakuleli lizokuya kule midlalo lihambela phezulu ngemuva kokuba ligile izimanga kwi-IAAF World Athletics Championships nonyaka eLondon liqeda likunombolo 3 ngemuva kokuba kwedlule belikunombolo 13.
Ngaphandle kwayo abagijimi baqoqe inqwaba yezindondo kumaSouth African Sports Awards ngeledlule eGoli lapho uCaster Semenya noLuvo Manyonga beqokwe emkhakheni wabavelele ngokwehlukana kobulili kwathi umqeqeshi kaCaster wahlomula ngowomqeqeshi ovelele.
I-ASA izothumela abasubathi abayisi-8 kule midlalo. Phakathi kwabo kukhona uManyonga onqobe yonke imidlalo ayigijime nyakenye, uRuswahl Samaai, uZarck Visser bonke benza iLong Jump.
Abanye abaseqenjini lesizwe nguHenricho Bruintjies oke waphatha irekhodi lakuleli le-100m ozokwenza i-60m, u-Emile Erasmus (60m), uCarina Horn (60m), u-Orazio Cremona (Shot Put) noDominique Scott-Efurd (800m ne-1500m).
UMengameli we-ASA u-Aleck Skhosana ubongele bonke abagijimi abaqokelwe ukumela elakuleli e-England. Uqhube wathi umnyango wabo awukavalwa, kusengenzeka kwengezwe ngabanye abasubathi.
Uthi bazimisele ukuthumela inqanawe yesikwati kule midlalo ngenhloso yokuzilungiselela imidlalo yamaCommonwealth Game ezokuba maphakathi nonyaka ozayo e-Australia.