Kuphelile ngophunyuka bemphethe
Bathi uma engazesuleli yena, liyoshona elanamuhla esexoshiwe yiphalamende
EMUVA kwamasonto amabili uMengameli wezwe, uMnu Jacob Zuma ( osesithombeni), etshelwe yiqembu lakhe, i-African National Congress (ANC) ukuba ashiye esikhundleni, kodwa wadaza inkani, izolo izinkomba bezithi umbuso wakhe usuphelile, liyoshona elanamhlanje engaseyena umengameli wezwe.
Izolo ekuseni bekulindeleke ukuba uMnu Zuma akhiphe isitatimende sokuthi useyashiya, kodwa kunalokho waba nenkulumo ekhethekile esiteshini sikamabonakude seSouth African Broadcasting Corporation (SABC), lapho ethe khona akazi ukuthi kuze kuthiwe makehle esikhundleni nje, wenzeni kubani.
Uthe yena akayi ndawo. UMnu Zuma usephathe lesi sikhundla cishe iminyaka eyisi-9. Uthe isigungu esiphezulu se-ANC, i-National Executive Committee, kasikaze simtshele izizathu zokuthi yini kufanele abeke phansi izintambo zombuso.
Ngokusho kwakhe, konke bekuhamba kahle phakathi kwakhe nobuholi obusha obuholwa ngumengameli omusha we-ANC, uMnu Cyril Ramaphosa, okhethwe ngoZibandlela (December) wonyaka odlule. Osekufake ingcindezi enkulu kuMnu Zuma ukuba ashiye, wukuthi i-ANC namaqembu aphikisayo sebevumelene ngokuthi namhlanje ntambama kuhlale iphalamende, amalungu avotele ukumxosha esikhundleni.
Okucacayo wukuthi uma engazisulelanga yena ngokwakhe, lingakashayi ihora lesibili namuhla ngoLwesine, iphalamende lizomxosha njengoba wonke amaqembu evumelana ngalokho.
Izolo uMgcinimafa we-ANC, uMnu Paul Mashatile, noSotswebhu waleli qembu ephalamende, uMnu Jackson Mthembu, batshele isigcawu sabezindaba eCape Town, emuva komhlangano ophuthumayo abebenawo namalungu e-ANC ephalamende ( caucus), ukuthi amalungu asetshelwe ukuba avotele ukuba axoshwe uMnu Zuma esikhundleni.
Laba bobabili bakhale ngokuthi umsebenzi kahulumeni, okuhlanganisa ukwethulwa kwenkulumo kamengameli ebhekiswe esizweni (State of the Nation) bekulokhu kubambezelekile ngenxa yokuba uMnu Zuma engafuni ukwehla esikhundleni. Bathe ngeke umsebenzi kahulumeni ulokhu ume nse, ngenxa yalesi simo, yingakho iqembu linqume ukusebenzisa iphalamende ukuxosha uMnu Zuma.
Ngesikhathi sokuloba izolo ebusuku, bekulindeleke ukuba uMnu Zuma akhiphe isitatimende esichaza ukuthi usenqume ukwenzenjani. Uma eqhubeka nokudaza inkani, engazishiyeli yena esikhundleni, lizoshona elanamuhla ngoLwesine esexoshwe yiphalamende. Ngokomthethosisekelo wezwe, ukuxoshwa ngale ndlela kuyosho ukuthi bonke ongqongqoshe bakahulumeni wakhe, kuhlanganisa nesekela lakhe, uMnu Cyril Ramaphosa, obuye abe ngumengameli we-ANC, bazobe sebephelelwe wumsebenzi ngoba kuzodingeka basule ezikhundleni. Uma kwenzeke lokhu, usomlomo wephalamamende, uNks Baleka Mbete, uzobamba lesi sikhundla isikhashana.
NGESIKHATHI sokuloba umengameli wezwe, uMnu Jacob Zuma ubengakazibeki phansi izintambo zombuso njengoba eyalelwe yiqembu lakhe, i-African National Congress (ANC), elaphakamisa igama lakhe ephalamende, lamvotela ukuba abe ngumengameli.
Ngenxa yokudaza inkani kukaMnu Zuma, engafuni ukwenza njengoba etshelwa yiqembu lakhe, ubuholi beqembu bunqume ukuba usotswebu walo ephalamende, uMnu Jackson Mthembu, afake isicelo kusomlomo wephalamende, uNks Baleka Mbete ukuba i-ANC ifake isichibiyelo esicelweni se-Economic Freedom Fighters (EFF) sokuvotela ukungamethembi uMnu Zuma.
Isigameko esinje, lapho iqembu elibusayo kuba yilona elivota namaqembu aphikisayo ephalamende ukuxosha umengameli othunyelwe yilona ukuba ahole izwe, yinto engakaze yenzeke ngaphansi kombuso wentando yeningi. Iqiniso wukuthi i-ANC bekungekho ebingakwenza ngoba kuyacaca ukuthi uMnu Zuma akazimisele nakancane ngokubeka phansi izintambo engakhishwanga ngomgxala njengoba sekuze kwaphoqa ukuba kube ngamalungu ephalamende azothatha isinqumo sokuba akhonjwe indlela yini noma cha, namhlanje.
Inkinga ngoMnu Zuma wukuthi kubukeka sengathi uzicabangela yena siqu sakhe, umndeni wakhe nabangani bakhe, akanandaba nokuthi izenzo zakhe zingalimaza umnotho wezwe, ukuthula nezakhamizi.
Le nkiyankiya yokwenqaba kwakhe ukushenxa esikhundleni isithathe cishe amasonto amabili, kwaze kwaphoqa nokuthi ukuvulwa kwephalamende nokwethulwa kwenkulumo kamengameli wezwe, ukuchaza izinhlelo zikahulumeni zalo nyaka, kuhlehliswe.
I-ANC kade imnxenxa, imthandaza, icela ukuba ashiye ngokuthula njengoba kwenze lowo obephethe phambilini, uMnu Thabo Mbeki, kodwa konke lokho wakushaya indiva. Enkulumeni yakhe ekhethekile neSABC izolo ntambama, uMnu Zuma ubesaqhubeka nokudaza inkani, ekhala ngokuthi i-ANC kayikaze imtshele emehlweni ukuthi wenzeni njengoba isithi makashiye isikhundla. Umholi ozikhathalele izakhamizi nezwe lakhe, ubezokwehlela ngezansi, enze njengoba etsheliwe ukuze kube nozinzo ezweni.
Lo mdonsiswano usudale ukuba ukusebenza kuhulumeni kucishe kume nse, yingakho isinqumo se-ANC sokufaka isicelo sokuxosha uMnu Zuma ngevoti ephalamende namhlanje, kuyisinqumo esifanele.
Lo mdonsiswano usudonse isikhathi eside kakhulu, abantu bakhathele manje. Sethemba ukuthi iphalamende lizothatha isinqumo namhlanje, limkhombe indlela uMsholozi.
Umholi onendaba nezakhamizi aziholayo ubezoshiya izintambo.