Babhuqwe yizisu yinyama yomsebenzi
Kusazohlolwa isidumbu
UGCWALE isibhedlela i-Edendale, umndeni wakwaZondi, eSigodini, eMgungundlovu, ngemuva kokudla inyama yomsebenzi eshiye amalungu awo ayisi-9 ebhuqwa yisisu kwagcina kushone elilodwa.
Ngokuthola kweLANGA, lo mndeni ugcine usungena esibhedlela ngoMsombuluko ukhishwa yizisu ezilumayo, emuva kokudla inyama yomsebenzi wokwembula umntwana wakhona ozalwe embethe.
Imithombo yaleli phephandaba - esondelene nalo mndeni - ithi kuyamangalisa ukuthi kube wumndeni wakulo muzi kuphela ogule wagijinyiswa ezibhedlela kodwa omakhelwane abebehambele umcimbi kababanga nalutho. Kuthiwa ubekezelile ngeSonto kodwa ngoMsombuluko wehluleka njengoba ulandwe ngama-ambulensi amabili.
“Baqale ukugula ngeSonto bazama ukuzelapha kodwa kwanhlanga zimuka nomoya. Baphuthunyiswe esibhedlela ngoMsombuluko, balala khona, abanye bakhishwa ngoLwesibili kodwa umufi ubebambekile, ebhekile kodwa engakhulumi, okuthe ebusuku ngoLwesibili, wadlula emhlabeni,” kusho lo mthombo.
Silobe izolo amanye amalungu amabili esasele esibhedlela - phakathi kwawo okunengane eneminyaka emithathu ubudala. UMnu Mandla Phineuos Zondi (57), oshonile, obekunguyena obengamele lo msebenzi emzini kadadewabo.
ILANGA lithole ngelinye futhi ilungu lomndeni ukuthi udokotela obesiza umufi uveze ukuthi usola ukuthi inyama ibinobuthi kodwa-ke kusazohlolwa isidumbu.
ILANGA lixoxe noMnu Mondli Zondi wathi nguyise lona odlule emhlabeni. Utshele intatheli ukuthi akathandi ukukhuluma ngalolu daba ngoba kaluzukuhintsha lutho.
“Ngiyacelake ukuthi ngingalinge nje ngibone into enjengaleyo ephepheni lakusasa ngoba nomndeni bese ngiwutshelile ukuthi kangifuni kukhulunywe ngale nto, kangazi ukuthi bakhulumeleni nawe,” kusho yena.
Utshele leli phephandaba ukuthi uma like labhala nje ngalolu daba, lizokubona okwabonwa nguSawuli.
Leli phephandaba lithole ukuthi kukhona abomnyango wezempilo abayile kulo mndeni bathatha inyama, amadombolo nokudla obekusalile ukuze kuyohlolwa. nonhlakaniphos@ilanganews. co.za