Bajabuliswe yisenzo somfundi (15)
Unikelela ozakwabo ngezichazamazwi
WETHUSE abaningi umkhankaso oqalwe ngumfundi osemncane wokunikelela ozakwabo abahlwempu ngezichazamazwi ngoba ebona bedonsa kanzima esiNgisini, ikakhulukazi ezindaweni zasemakhaya.
Kabawuvali umlomo abantu baKwaDlangezwa, eMpangeni, ngeqhinga likaSithembiso Khumalo (15) wakule ndawo njengoba enentshisekelo ngalolu hlelo lwakhe olubizwa ngeSharing the Knowledge.
Unina kaSthembiso, uNkz Lindiwe Dube, uthi umethusile umcabango wendodana yakhe ngoba isencane kakhulu.
Utshele ILANGA ukuthi uSthembiso uxoxe nozakwabo (uNkz Dube), asebenza naye eSanlam Centre khona eMpangeni ngesifiso sakhe, waze wasidlulisela nakwelinye lamaphephandaba omphakathi, okuyilapho kuqhamuke khona uxhaso lakwa-Oxford Dictionary ngoba bethi bayaluthanda lolu hlelo.
“Ngizwe sengitshelwa nguzakwethu ukuthi ingane yami ithi inephupho lokunikelela izingane ezihlwempu. Ngiqale ngayithatha kalula le nto, kuthe sengimbuza uSthembiso, wathi kunesimo esimphathe kabi ekilasini lakhe lapho ebone khona omunye umfundi engenaso isichazamazwi ngenxa yokweswela, kwazise uthisha wakhe wesiNgisi akafundisi singekho etafuleni.
“Uthe ubengathandi ukuqala lolu hlelo esizwa yimina, ubefuna ukuzimela,” kusho uNkz Dube.
Uthi okunye okushiwo yingane yakhe wukuthi kunabafundi okungesikhona ukuthi bayizidomu uma befeyila, kodwa kungenxa yokuthi basuke bengawaqondi amagama esiNgisi uma kubhalwa izivivinyo.
Uveze nokuthi emuva kokuba abakwa-Oxford bebone lolu daba, baxhase ngezichazamazwi ezingama-37 kanti yena uNkz Dube uthenge ezili-10.
“Uthi akanandaba noma ngabe leso sichazamazwi sesigugile, kodwa okubalulekile wukuthi kusizwe abangenawo amandla okuzithengela,” kusho uNkz Dube.
Utshele ILANGA ukuthi kunezichazamazwi ezili-148 abazinikezwe ngabakwa-Oxford, okumele bazidlulisele ezikoleni. Njengoba zivuliwe izikole, uSthembiso unikelele iDumenkungwini Primary School oPhongolo, enyakatho yeKwaZulu-Natal, okungesinye sezikole ezisemakhaya esihlonzwe ngabakwaSiwela Youth Project, okuyinhlangano engenzi inzuzo.
Le nhlangano inikela ngemifaniswano ezikoleni.
ILANGA livakashele esikoleni salo mfundi, iBirdswood Secondary School, lakhuluma noMnu Themba Nyembe onguthisha wakhe wesiNgisi othe naye kumethusile okwenziwa nguSthembiso.
“Into ebulala izingane zethu kulolu limi wukuthi othisha bafundisa singekho isichazamazwi. Kwelami ikilasi kangiqali ukufundisa uma singekho, umfundi nomfundi ngifuna abeke esakhe phambi kwakhe. Le ngane isazoya kude kakhulu ngobuhlakani bayo,” kusho uMnu Nyembe.
Uthishanhloko waseBirdswood, uMnu Stanley Mazibuko, uthi ngesikhathi eqala ukuzwa ngalolu hlelo nyakenye, akazange akholwe ngoba uSthembiso umazi njengomuntu onamahloni.