UBAHUBHE UZOBONGA ABALANDELI NGOKUHLABANA
AKAZISOLI ngokubhuquza emgwaqweni ekhankasela ivoti umculi kamasikandi ohlabane ngonyanyavu lwemoto, eguqisa izinkunzi ezihlonishwayo kulo mculo emcimbini obuKwaDukuza nyakenye.
UBahubhe Mkhize, okhale wemuka neTotota Fortuner entsha ceke nyakenye, uthi umkhankaso umshiye emnyama, ezacile ngenxa yokucula emigwaqweni kodwa namhlanje uyaziqhenya ngoba ukwazile ukuthola le moto.
Usho lokhu nje, uhlele umcimbi wokubonga umphakathi wangakubo KwaMadinda, eHighflats, eningizimu yeKwaZulu-Natal, mhla zintathu kuNdasa (March) ngokunqoba kwakhe.
Uthi nakuba kukhona abaculi abangajabule neze ngokunqoba kwakhe kodwa kumele bamukele.
“Ngisebenzise uhlelo olubukelwa phansi ngesikhathi ngikhankasa. Bengicula emigwaqweni namavukana, ngiya emasontweni okubalwa elikaMfu Vusi Dube nesezindaweni zokucima ukoma.
“Bekuthi uma ngibona abantu emgwaqweni ngivele ngimise imoto ngibavotise. Ngenze lokhu abanye abaculi abangakwenzi njengoba besaba ukuthi kuyabaphuphisa noma kubehlisa isithunzi kubalandeli babo,” kusho uBahubhe.
Kuke kwaba namahlebezi athi umasipala wesifunda wangakubo, iHarry Gwala, umathintanyawo ukumxhasa ukuze lo mcimbi uphumelele.
Okuthiwa bekukhalisa kakhulu lo mculi wukuthi omunye wangakubo ocula i- gospel, uJumbo, ubenzelwe umcimbi ebongelwa ngokunqoba kwakhe kwiCrown Gospel Awards nyakenye.
Okhulumela uMasipala waseHarry Gwala, uMnu Ndabezitha Tenza, uthi basemalungiselelweni okumhlonipha lo mculi bewumasipala.
“Siphezu kwamalungiselelo okumenzela umcimbi, siyalwazi udaba lwakhe futhi siluthathela phezulu kakhulu ngoba ngempelasonto edlule ukhona umculi wethu, uJumbo, ebesimenzelile,” kusho uMnu Tenza.
Kulo mcimbi kuzonandisa uPhuzekhemisi, uMbuzeni, iChwane Lebhaca, iThwasa Lekhansela, iNyonemhlophe, oSaziwayo, uQhosha, uCevuzile, uJaivazimnike noSukasambe. Kungenwa ngo-R50.