Izigemegeme ezidumile zikaMsholozi
Phakathi kwezinto ezibe wumphumela wobuholi bakhe...
IMPILO kaMengameli Jacob Gedleyihlekisa, Mhlanganyelwa Zuma, osephenduke iqaqa nakubantu beqembu lakhe, i-African National Congress (ANC), iyiveza kahle incazelo yamagama akhe.
Kukumfundi ukuba azitholele ukuthi naleli lesiHebheru (Jacob) uyalilandela ngempela na. Uzalwe mhla zili-12 kuMbasa (April) we-1942 eNkandla. Uzalwa nguGcinamazwi Zuma owayeliphoyisa. Unina nguNobhekisisa Zuma owayesebenza emajalidini. Ngenxa yokuthi uyise washona uMengameli Zuma esemncane, akazange abe nalo ithuba lokuya esikoleni esakhula.
Waqala isikole sakusihlwa lapho yena nabahlobo bakhe babekhokhela othile wesifazane u-25c ukuba abafundise. Njengoba ebephila phansi kwezimo ebezithinta wonke umuntu omnyama, naye uMengameli Zuma udlule kuzona nabanye abebesemzabalazweni wenkululeko. Olwakhe uhambo lwehlukile kolwalabo abamandulele kwesokwengamela iNingizimu Afrika.
Nokho lolu wuhambo olude ngakho sizokha phezulu ngempilo yakhe, ikakhulukazi ngezifikise leli lizwe kuleli qophelo. Kuthiwa ezombusazwe uziqale eneminyaka eli-17 ubudala. Ngesikhathi esesebenza emajalidini eThekwini, ubeyaye ahambele imihlangano ye-ANC ngowe-1959.
Ngonyaka olandelayo uhulumeni wobandlululo wayivala umlomo i-ANC nezinye izinhlangano zabamnyama. Wabuthwa waba yilungu loMkhonto weSizwe ngumufi, uMoses Mabhida, waba yilungu lombutho wentsha yeANC nelomfelandawonye wezinyunyana zezisebenzi, iSouth African Congress of Trade Unions (Sactu).
Emuva kokuboshwa nokuphumela ngaphandle kwemi- ngcele yaseNingizimu Afrika, ugcine ebuyile nabebesekudingisweni ngesikhathi amaqembu abamnyama evulwa imilomo wuhulumeni kaMnu Frederik "FW" De Klerk ngowe-1990. Engakangeni esikhundleni, uthe uyokwaneliswa uma ephathe ihlandla elilodwa kwesobungameli. Kulesi sikhundla ungowesine emuva kukaMnu Nelson Mandela, uMnu Thabo Mbeki noKgalema Motlanthe. Izimpi adlule kuzona ngaphambi kokungena kulesi sikhundla kazikholakali.
Okokuqala, uphunyule ecaleni lokudlwengula, kwelinye izwe okwakuyobe sekufana nokuthi liphelile ikusasa lakhe kwezo- mbusazwe lingakathethwa nokuthethwa lelo cala.
Unqobe okhethweni lokwengamela i-ANC engqungqutheleni ebisePolo-kwane ngowezi-2007. Uphunyule kuwona wonke amacala angama-783 aphathelene nodaba lwenkohlakalo ngokuthengwa kwezikhali wuhulumeni. Lokhu kwenze umphakathi wamzwela, akhula namathemba ngokuthatha kwakhe. Idumela likaZuma liqale lapho kubikwa ngezinga eliphezulu lenkohlakalo odabeni lokuthengwa kwezikhali nalapho enukeke khona. Olunye udaba oluphendule uMsholozi wanyamanambana kwizakhamizi zakuleli ngolokwakhiwa komuzi wakhe oseNkandla ngezigidi zamarandi zemali yabakhokhi bentela, okubikwe ukuthi bekuhaqwe yinkohlakalo enuka phu. Kube sekulandela nalolo oluthinta iqhaza lomndeni wakwaGupta ekukhombeni ngejozi umbuso, okuholele ekutheni kuze kube nophenyo luka-Adv Thuli Madonsela esengumvikeli womphakathi.
Yiwona lo mbiko ovele nele “State Capture” - ukulawula umbuso ngesiqhebezabuqama.
Kulawo mapeketwane, umnotho wezwe wehliselwe ezingeni likavobe yizinhlangano ezihlaziya izimo zomnotho emazweni ngamazwe njengeS&P, Moody’s Global neFitch. Emuva kokuvela obala kwenkohlakalo yomndeni wakwaGupta - phakathi kwayo okubalwa eyamathenda obuwathola ezinkampanini zikahulumeni, wudaba lwepulazi laseVrede, eFree State, elisetshenziswe njengebhuloho lokudlulisela imali kulo mndeni namahlebezi okuthi lo mndeni ubunesandla ekuqokweni kongqongqoshe abathile - linciphile idumela lokuthandwa kukaJZ, okungesinye seziteketiso zakhe.
Izinto zibheke phansi lapho eseveza izimpawu zokungakwemukeli ukuboniswa nayizethenjwa zakhe.
Lokhu kugqame lapho ibhantshi ligcwala umoya kongqongqoshe bezemali izikhathi ezine.
Kuqale kwaba nguMnu Pravin Gordhan, nguMnu Nhlanhla Nene, nguMnu Des van Rooyen, kwamphinda isibili uMnu Gordhan bonke abebekhishwa qede kungabikhona ncazelo. OKUNGASE KULINDELEKE
Phakathi kwezinto ezihamba phambili ezingase zenzeke masinyane yilezi:
- Izinguquko kwikhabhinethi kazwelonke; - Ukuma ngqi kohlelo lokungena esivumelwaneni sodaba lwenuzi neRussia. Phakathi kwezinto ezibe wumphumela wobuholi bukaMengameli Zuma, ngeke yasala eyoqhekeko kwi-ANC olubonakale ngokuzalwa kwamaqembu amasha ezombusazwe, iCongress of the People (Cope) ne-Economic Freedom Fighters (EFF). UDkt Makhosi Khoza naye ugcine ephumile kwi-ANC wathi usungula elakhe iqembu obekungakabonakali lutho olutheni ngalo.
Okunye kube wuqhekeko kumadlelandawonye okuyi-ANC, iSouth African Communist Party (SACP) neCongress of South African Trade Union (Cosatu), okuphethe ngokuba kuvele Association of Mineworkers and Construction Union (Amcu) neSouth African Federation of Trade Unions (Saftu) okukhona inqwaba yezinyunyana ngaphansi kwayo - kubalwa neNational Union of Metalworkers of South Africa (Numsa) exebuke kula, iholwa nguMnu Irvin Jim ongunobhala-jikelel wayo.
Zibalelwa ema-20 izincwadi esezibhaliwe ngoMengameli Jacob Zuma, iningi lazo ezingakhulumi kahle ngaye. Ezinye zalezi zincwadi zinyakazise izwe lonke njengebhalwe nguMnu Jacques Pauw esihloko sithi "The President’s Keepers". Kukhona nekaGayton McKenzie ethi “Kill Zuma - By Any Means Necessary” nenye ethi “When Zuma Goes” kaRalph Mathekga, ngethi “Zuma Exposed” ka-Adriaan Basson nethi “Enemy of The People” kaAdriaan Basson noPieter Du Toit.