UZOFIHLWA KWASANTI U-ANGEL
KUBIKWA ukuthi bavela nxa zonke abafuna ukufaka isandla emalungiselelweni omngcwabo wentokazi ebiwumdansi, eshone ngesonto eledlule ngemuva kokuxinwa wukugula okungaqondakali.
Umnewabo omdala ka-Angel, uXolani Zulu, uthi kufike abaholi be-African National Congress (ANC) egatsheni lakwaSanti ngemuva kokuthola izindaba zokudlula emhlabeni kuka-Angel.
Uthi laba baholi bafike baveza ukuthi u-Angel ubeyilungu elikhuthele enhlanganweni ngakhoke bacela umcimbi wokufihlwa kwakhe bawenzele ezinkundleni zemidlalo KwaSanti.
“Bacele ukwenza umngcwabo omkhulu, ozokwazi ukuhanjelwa ngamalunga omphakathi wonke ngoba u-Angel ubesebenzela umphakathi,” kusho uXolani.
Uthi konke lokhu bazokwenza ngokuhlanganyela nabeMTV Base, abakuqinisekisile kwi
LANGA LangeSonto ngeledlule ukuthi kukhona abalekelela ngakho umndeni.
Imicimbi yokukhumbula u-Angel iqale izolo khona KwaSanti, ehholo lomphakathi, lapho bekunenkonzo yesikhumbuzo. Namhlanje kuzobe kunenye eThe Warehouse, enkabeni yeTheku, lapho kuzobe kuhlangene bonke abedansa nabo.
Inkonzo yomngcwabo izoba sesontweni lamaRoma KwaSanti bese kuyiwa ezinkundleni zemidlalo lapho kuzoqhubeka khona uhlelo ngaphambi kokuba kudlulelwe emathuneni akuyo le ndawo.
UNobhala we-ANC Youth League (ANCYL) esifundeni iTheku, uMnu Thinta Cibane, ukuqinisekisile ukuthi bayazi ngomngcwabo ka-Angel futhi zikhona izinhlelo abaphezu kwazo.
“Abaholi baKwaSanti basibikelile ngalolu daba, sabayalela ukuba basebenzisane nekhansela lendawo, uMnu Shiphe Buthelezi,” kuchaza uMnu Cibane.