UGQUGQUZELA UBUMBANO KUBACULI
UZOKHIPHA i-albhamu ehlanganisa uMaskandi nowokholo ngoba efuna ukwelapha imiphefumulo emphakathini nakozakwabo emculweni kamaskandi onqobe emncintiswaneni womaskandi abasavelela kwi- festival ebizwa Ukuthula Arts Festival ngowedlule.
UBoy "Bhokweni" Dlamini (40) owadla umhlanganiso kule festival, uthi useqome ukulinda kuze kube yiPhasika ukuze akhiphe i-albhamu yakhe. Uthi ungene emculweni ngowe-1997 esebenza noRanger Qwabe emdlalela isigingci uQwabe yena eshaya esebhesi.
Le nsizwa ithi ngenxa yothando lomculo olwalumlawula, wajoyina iqembu likamaskandi elalizinze eMseleni, iVukani, nakhona edlala esigingci esiphambili kodwa lokhu kakuzange kumfikise ezingeni abelilindele.
Kuthe ngowezi-2012 wasungula iqembu lakhe kwathi ngowezi-2014 wakhipha icwecwe elimtoti elisihloko sithi: "Zulu Omnyama" elimenze wahlabana ngendondo yeBest Maskandi New Comer kuSakhisizwe ehlelwa uMjaphane Mkhize, eliphinde ladayisa kangconywana kunalokhu abekulindele.
Le nsizwa ithi sekunesikhathi eside ingenile emculweni kodwa isazimisele ngokuba yelaphe imiphefumulo yabantu njengoba inamathalente ahlukene okubalwa nelobunyanga.
UBhokweni ongowokudabuka KwaMnqobokazi, eHluhluwe, uthi leli cwecwe lizobe liphethe umyalezo ogqugquzela ubunye kubaculi njengoba kubukeka kulokhu kufufusa ukungezwani kubaculi esikhundleni sokuba babambisane ukuze bezonqoba.
Uthi kulokhu upike ukusebenza noMkhanyiselwa noDingamandla beqembu Abagqobhi.
"Empeleni nginekhono eliyisimanga ngoba ngikwazi ukulumbanisa ukwelapha ngokomoya nokwelapha ngokwenyama okuyinto engelula ukuyenza ngaphandle kwesineke.
"Nakule CD engizoyikhipha ngePhasika ngithi abantu mabalindele ulozolo lodwa ngoba angigayelwa mphako ngempela ngiyibophele angidlali," kusho yena.