IBUYA NOKWEHLUKILE I-MAGIC TOUR
KONKE sekumi ngomumo ngomcimbi wokugqugquzela abafundi ukuba baziphathe kahle obizwa ngeMagic Tour.
Lo mcimbi uke wanyamalala iminyaka elinganiselwa kwemibili ngemuva kokuba umhleli nomsunguli wawo, uLinda ‘Mr Magic’ Sibiya, exoshiwe emsakazweni uKhozi FM.
Wenzeke unyaka owodwa esehambile oKhozini esesebenza kwiVuma FM ngemuva kwalokho wangabe usaba khona ngenxa yokugqoza kwabaxhasi.
Ekhuluma neLANGA LeTheku uthi konke sekumi ngomumo futhi uthembisa nokuba sezingeni eliphezulu komcimbi.
Yize engabadalulanga abaxhasi bakhe, kodwa uthe sebekhona abazofaka isandla kulo mcimbi.
Uthi okwehlukile ababuya nakho kulo nyaka wukuthi kuzoba khona uhlelo lokuzivoca voca nezemidlalo.
“Kuyimanje sisematasa ngezinhlelo zokuthola uSbahle Mpisane oyi- fitness instructor ukuze ezosiza abafundi ukuzivocavoca kodwa konke okunye sekumi ngomumo,” kuchaza uMr Magic.
Mhla zimbili kuNdasa (March) kuzoba khona umcimbi wokuwethula eHilton Hotel, eThekwini.
IMagic Tour izoqala eDurban University of Technology (DUT) mhlaka-9 kuNdasa kanti eMangosuthu University of Technology (MUT) izoba mhlaka-16 ngenyanga ezayo.
ULinda uthi kabakabi nezinsuku ezibekiwe zokuvakashela ezinye izikhungo kodwa basezingxoxweni. Abaculi abazonandisa uThina Zungu, uJnr De Rocker, uDumi Mkokstad, Abathandwa, uBetusile, uThokozani Langa, uDJ Boonu, uDJ Masiya, noKhu
zani Mpungose.