Uyayiphika eyokudayisa amasheya
KUKHOLAKALA ukuthi uMnu Christoffel “Christo” Wiese, udayise amasheya akhe ayizi-630 million kwaSteinhoff International ngoba ephoqwa ngabatshalimali bakhe, kuhlanganisa namabhange akwamanye amazwe.
Yize ingekho imininingwane ethe thuthu, kodwa ngonyaka wezi-2016 uMnu Wiese - okunguyena yedwa umuntu ohamba ngayedwa obenamasheya amaningi kwaSteinhoff - usebenzise amasheya akhe ayizi-628 million kule nkampani njengesibambiso ngesikhathi eboleka imali kwaCitigroup, HSBC, kwaGoldman Sachs Group nakwaNomura Holdings.
Usebenzise le mali ekuthengweni kwamasheya ngesikhathi iSteinhoff ithenga iMattress Firm and Poundland. Ngaleso sikhathi, amasheya abebiza ngaphezulu kuka-R80 lilinye - elinganiselwa ku-R50 billion esewonke. Athengiswe ngemali elinganiselwa ku-R6 emasontweni ambalwa edlule - isheya lilinye - okusho ukulahlekelwa yizigidi ngezigidi zenkece.
Kunenkolelo yokuthi amabhange abengaxhumi engaxhasi kwezinye izimpahla zikaMnu Wiese, okusho ukuthi yiwona alahlekelwe ngokuthengiswa ngemali encane kwala masheya. Izindaba zokuthi uMnu Wiese wehlise isiteki sakhe sisuka ema21% saya esi-6.2%, kubukeka zidale itwetwe ezimakethe zehlisa amasheya akwaSteinhoff ayoshaya esi-6.57% ngoMsombuluko.
Ekhuluma ephalamende mayelana nokuguqa kweSteinhoff ngoMasingana (January), uMnu Wiese, uthe: “Kangikaze ngidayise ngisho nelilodwa isheya kule nkampani selokhu ngiqale ukuwathenga ngowezi-2011.”
Njengoba engaseyena umqondisi wakwaSteinhoff, kwazise wesulile ebhodini lale nkampani mhla zili-14 kuZibandlela (December), uMnu Wiesse kakukho okumphoqayo ukuba adalule imininingwane mayelana nokudayiswa kwamasheya (akhe).
UMnu Dan Matjila, oyisikhulu esiphezulu sePublic Investment Corporation (PIC), uthe bekungaba wumqondo ophusile ukuba uMnu Wiese amasheya akhe uwadayisele inkampani yaseNingizimu Afrika ukuze ukulawulwa kwale nkampani kuhlale kusezandleni zakuleli.
I-PIC inamasheya ayisi-7.5% kwaSteinhoff. Umthombo ngabe: BusinessDay