Yazi into ekuhlanganisa nalowo muntu ohlangene naye
KAYIKHO into ebuhlungu njengokuhlangana kwabantu abangazi ukuthi bahlanganiswe yini emhlabeni.
Uma abantu bezithola bendawonye kanti kabasazi isizathu esibahlanganisile, vele bazolumana, baxhaphazane futhi ngenxa yokuthi nje kabazi bahlanganiswe yini.
Yingakho nje izingcithabuchopho zithi “uma isizathu sokuhlangana kwabantu sesingasaziwa abantu bayaxhaphazana”.
Uma ingane ingasazi nokubaluleka komzali, ngeke kube lula ukumhlonipha, izolokhu incengwa ukuba imlalele.
Uma umfundi engasazi ukuthi yini indaba engumfundi, uzolokhu encengwa ukuba afunde.
Uma ushayela itekisi, shayela itekisi uyise abantu lapho beya khona ngoba yiyona into oyihlalele phambili, ungezwakali usulwa nabagibeli.
Uma wena ungumgibeli, yeka ukulwa nomshayeli, hlala phansi uyiswe la uya khona - ungumgibeli kawusona isedeleli.
Bonke abantu emhlabeni kufanele bazi ukuthi bahlanganiswe yini.
Kwabathandanayo - njengoba nje sigubha inyanga yothando - ukuze kuhlale kumnandi, mabangakhohlwa ukuthi bahlanganiswe wuthando hhayi ukulwa.
Kanjalo nasemsebenzini, masingakhohlwa wukuthi sihlanganiswe yini.
Uma kunomuntu okuhlinelayo, ungakufaki lokho enhliziyweni ngoba vele emsebenzini kawuyelanga ukuyothandwa, uyosebenza.
Masiyivale le ngosi ngokuthi ake sifunde ukwaneliswa ngalokho esinakho.
Uma unezingane noma zihlupha nje, kodwa zithande ngoba kukhona umuntu la emnyango ongabatholi abantwana, ofisa ukuba nengane noma ingahlupha.
Uma unesithandwa sakho, zama ukusincenga usiphathe kahle, usi- thande ngoba baningi la emnyango abasihalelayo.
Siphinde sifunde ukwamukelana sinjengoba sinjalo, singafuni ukushintshana ngoba ngeke umshintshe umuntu.
Uma ufuna ukuthola uMfu Zondo bukhoma, vakashela ibandla lakhe njalo ngeSonto ngehora le-10 eJewish Hall, eNorth Beach maqondana nePavillion Hotel ngo11h00.
Ungaxhumana naye kwethi: 078 419 1024; Ungamshiyela nomyalezo kuFacebook: Sthembiso Zondo Fan Page noma kuWhatsApp: 082 070 8034
Kubo bonke abafundi bephe- phandaba lethu ILANGA, siyafisa ukuba sisizane futhi ngiyafisa ukuniphendula nonke, ngebhadi ucingo noma inombolo iyodwa ngakho kakulula ukunisiza nonke.
Uma ufona uyizwa ikhala, ngesinye isikhathi ngisuke ngisakhuluma nomunye.
Nixole kuleyo ndawo kodwa ngokushiya nje umqhafazo, siyakubeka nasemkhulekweni.
UPastor Sthembiso Zondo ngumeluleki nomethuli wezinkulumo ezakhayo.
Uzobe ephendula imibuzo yabafundi ngezinkinga zempilo nezinkinga eziphathelene nezothando kwiLANGA