BABONA I-KINGS INGABA YISIXAZULULO KWI-PREMIERSHIP
IREAL Kings ingase iphenduke isixazululo sezikhulu zamakilabhu aKwaZulu-Natal agijima kwi-Absa Premiership uma igcina ngokunyukela kulesi sigaba ngokuphela kwale sizini.
IKings ibalwa namakilabhu asembangweni wokunqoba iNational First Division (NFD) kumbe ukubamba iqhaza emidlalweni yokuhlungela ukungena kwi-Premiership. Ihlezi endaweni yesithathu kwi- log yalesi sigaba.
ILANGA lithole ukuthi kakuzona izikhulu zeKings nje kuphela ezimincele ukuthi le kilabhu ingene kwiPremiership kodwa yisimo esifanayo nakwezinye izikhulu zamakilabhu ezigqobhoka amaphakethe zihambela imidlalo.
Lokhu kufakazelwe nguFarook Kadodia onguSihlalo weMaritzburg United, othe: “Ukwenza kahle kweKings kuyangijabulisa. Ngiyafisa nje ukuthi abaphathi bayo balwe ngazo zonke izikhali abanazo ukufaka le kilabhu kwiPremiership.
“Ukwanda kwamakilabhu adlala kulesi sigaba akulesi sifundazwe kuzonciphisa izindleko. Ngiyacela nje ukuthi balwe bayifake le kilabhu kwiPremiership ngoba empeleni sidinga amakilabhu amane alapha kulesi sigaba.”
Isifundazwe simelwe yiTeam of Choice, iLamontville Golden Arrows namaZulu FC esigabeni esikhulu.
IKings izobhekana neRichards Bay FC koweNFD ngoMgqibelo ngo-15h30 eKing Zwelithini Stadium, eMlazi.
ILANGA lithole ukuthi le kilabhu ivuselele inkontileka noRicardo Goss ongunozinti, uLindokuhle “Maleven” Mtshali olihlikihla esiswini, uS’phamandla “Bazooka” Majola noS’phiwe “Magolide” Mbatha. Izindaba zokuvuselelwa kwezinkontileka ziqinisekiswe nguPhilani Majola ( osesithombeni) ongomunye wezikhulu zale kilabhu.
Abalandeli abazohambela lo mdlalo bazobuye bazitike ngomculo nangomdanso kaZodwa Wabantu noDj Target. Amathikithi alo mdlalo abiza uR20 kuma- computicket kanti enkundleni azotholakala ngo-R30.
UJean Francois Losciuto ocija iBay FC, uthi bawadinga kakhulu amaphuzu alo mdlalo ukubalekela ukugencwa yizembe elibhekene nabo.
Isiyonke imidlalo yeNFD engempelasonto imi kanje:KUSASA NGOLWESIHLANU EParow Park: Cape Town All Stars vs Tshakhuma Tsha Madzivhandila 15h30. NGOMGQIBELO EHarry Gwala: Royal Eagles vs UThongathi FC 15h30.
EKing Zwelithini: Real Kings vs Richards Bay FC 15h30.
EMthatha: Mthatha Bucks vs Pretoria University 15h30.
EThohoyandou: Black Leopards vs Mbombela United 15h30. NGESONTO EParow Park: Stellenbosch FC vs UBuntu Cape Town 15h30.
EVosloorus: Jomo Cosmos vs Highlands Park 15h30.
EGoble Park: Super Eagles vs Witbank Spurs 15h30.