UShenge ukhala ngabaqola iqembu
Uthi amalungu akhala ngokungabi namali uma ethi makuvuselelwe ubulungu
UZWAKALISE ubuhlungu uMengameli we-IFP, iNkosi Mangosuthu Buthelezi, mayelana nabaholi baleli qembu abathatha amabhuku ekomkhulu lalo bethi bayojoyinisa amalungu kodwa imali okujoyinwe ngayo ingabe isabuyela eqenjini.
Lokhu ukuveze ngesikhathi i-IFP inomkhankaso wokungena umuzi nomuzi KwaMashu, izolo ngeSonto njengoba leli qembu lihlelela ukuya okhethweni lukazwelonke ngonyaka ozayo.
Uthi lokhu kusho ukuthi laba baholi bayayikhwabanisa le mali obekufanele ngabe isiza iqembu.
"Kule minyaka edlule iqembu lilahlekelwe yimali elinganiselwa ku-R3 million kulolu hlobo lokweba. Ake ucabange nje ukuthi yini ebesingayenza ngo-R3 million? I-IFP ibingenza okukhulu okhethweni uma ibinawo lo R3 million phezu kwenkece enayo," kusho iNkosi Buthelezi.
Utshele amalungu e-IFP abemlalele ukuthi uma abantu abaqotho behlangene, amazwi abo ayahlangana kuthi uma bekhuluma bazwakale kakhulu, kabazibeki kwabakushoyo ngoba bazwakala izwe lonke.
Lo mholi ohlale ezitusa ngokuthi kalikho iphunga lenkohlakalo elimlandelayo, uthe njalo uma ekhuluma indaba yokuthi amalungu e-IFP kumele avuselele ubulungu, aye akhale ngokuthi kunzima ukukhipha o-R10 bokukhokhela ubulungu.
"Ngiyanincenga ukuba labo abakwaziyo ukukhokhela ubulungu bakwenze lokho, nigqugquzele abaholi benu ukuba le mali (yobulungu) bayibuyisele eqenjini. Kakukhona ukuthi abantu kabafuni ukukhokha, imindeni ithwele kanzima, isimo somnotho sibi, intsha yethu eningi kayisebenzi," kusho yena.
Uthi I-IFP ngeke ixoshe abantu ngoba nakhu kuthiwa kabanayo imali, ikakhulukazi uma kuthiwa bavuselela ubulungu.
"Yimali yobulungu esiza ukuba sikwazi ukuhlangana kanje, senze izikibha senze amakhophi emigomo yethu," kusho yena.
Utshele abantu baKwaMashu ukuthi kukubona ukwakha ikusasa elingcono, yibona abangashintsha indawo yabo.
Uthe uyohlale ekubonga ukwesekwa kweqembu lakhe emahostela.
"Siyazi ukuthi abantu abaningi bahlala emalokishini, noma yiliphi iqembu elingenabo abalandeli emalokishini kalenzi kahle. Ngakho-ke sifuna ukukhulisa i-IFP emalokishini aKwaZulu-Natal, siqinise amagatsha ethu la.
"Sidinga ukwandisa amalungu e-IFP ukuze sizokwazi ukuthola amavoti amaningi uma sekuvotwa ngonyaka ozayo. Sinesikhathi esincane sokuba sikhankase njengoba ukhetho seluseMome," kusho iNkosi Buthelezi.