UDINDE ISILILO BENGENA KWEYENDEBE YOMHLABA

UKHALE mi izinyembezi umqeqeshi weqembu lesizwe laseNingizimu Afrika labesifazane abaneminyaka engaphansi kweli17 ubudala, iBantwana, ezakhe zingena kweyeNdebe yoMhlaba ezoqala mhla zili-13 kuLwezi (November) isongwe lulunye kuZibandlela (December) e-Uruguay.

IBantwana ingene kule midlalo ihlula iMorocco ngo-1-0 wegoli likaSibulele Holweni elingene ngomzuzu wama-68 kulo mdlalo obungoMgqibelo ekuhambeni. Kube ngu-6-1 uma sekuhlanganiswe nomphumela womlenze wokuqala.

Emuva kwalo mdlalo, uSimphiwe Dludlu oqeqesha iBantwana ukhihle izinyembezi. Nokho uthi ufikelwe wumunyu ohambisana nenjabulo. Ubonge uNkulunkulu nobanjiswano nabadlali.

“Bengikhaliswa yinjabulo yokuqonda. Sisuka ebunzimeni nabadlali,” kusho uDludlu.

UNomsa Mahlangu osesigungwini seSafa kuzwelonke, utshele ILANGA ukuthi ukudlala kahle kweBantwana kumjabulisa kakhulu njengoba ngonyaka ozayo kuzoqala iFifa Women’s World Football League.