IDowns ibiza izimbangi ngezimpelesi

UManyisa akakuboni okungabasusa esicongweni

U-OUPA Manyisa oyisilomo seMamelodi Sundowns ubona izimbangi zabo zizojulukela ubala uma zizama ukubasusa esicongweni seAbsa Premiership njengoba ekholwa wukuthi sebeyibambe ngesandla esisondwa inkomishi yeligi.

ISundowns izogadulisana neFree State Stars kowe-Absa Premiership ngoLwesithathu ngo19h30 eLoftus Stadium, eTshwane.

Lo mdlalo ubhekwe ngabomvu kwazise yimpi yasesicongweni. Womabili la makilabhu asembangweni wokuthatha lesi sicoco seligi.

UManyisa odlala esiswini kwiDowns, uthi bazojulukela ubala abacabanga ukuthi bazogudluza iSundowns esicongweni.

“Konke kulele kithina ngesicoco seligi, ozosinqoba ngaphandle kwethu uzokube esinikwe yithina uqobo. Nokho ngeke kwenzeke lokho. Ngendlela imiqondo yethu eyiyona siyakwazi okufanele sikwenze. Umdlalo weFree State uzokuba nzima kodwa sisekhaya ngeke sikwazi ukudedela amaphuzu,” kusho uManyisa.

UKatlego Mashego odlala emuva kwiFree State, uthi ngeke bayibukele iSundowns izenzela umathanda kubona.

“Silindele umdlalo oseqophe- lweni eliphezulu kubona njengoba besekhaya, ngeke kube lula ukubehlula. Nokho imimoya iphezulu ekhempini sizokulwa kulo mdlalo,” kusho uMashego.

Isiyonke imidlalo ye-Absa Premiership ehlelelwe ukugijinywa phakathi nesonto imi kanjena:KUSASA NGOLWESIBILI ERoyal Bafokeng: Platinum Stars vs SuperSport United 19h30 (SS4). NGOLWESITHATHU ELoftus Versfeld Stadium: Mamelodi Sundowns vs Free State Stars 19h30 (SS4).

Ngendlela imiqondo yethu eyiyona siyakwazi okumele sikwenze...