Kunenzondo eyesabekayo ebhekiswe oSuthwini
SEKUNGICACELE ukuthi impi yamaZulu FC neMaritzburg United kayipheli enkundleni kodwa isigubuzelwe yinzondo namagqubu eqhutshwa nangabanikazi beTeam of Choice okuyinto engenasidingo.
Umdlalo webhola kumele usetshenziswe ukunika umphakathi injabulo nokuhlanganisa abantu ikakhulukazi bezinhlanga ezahlukene. Nokho-ke sengikuqaphele izikhawu eziningana ukuthi iTeam of Choice inenzondo ejulile ngoSuthu.
Ngiqale ukunakisisa lokhu ngesikhathi besihlula emdlalweni wokugcina weligi ngesikhathi sigencwa yizembe kumasizini ambalwa edlule.
Kuhle ukujabula nxa unqobile kodwa okweMaritzburg bese kunokuklolodela abalandeli bethu abebedinda isililo ngokudliwa yizembe. ITeam of Choice cishe ihlale ihora lonke eMoses Mabhida Stadium ijabulela umphumela walo mdlalo oyenze yangena kwi- top 8 okokuqala kwathi eyethu indlela yabheka kwiNational First Division.
NangoLwesihlanu sibhekene nabo eMgungundlovu ngikuqaphelile ukuthi iMaritzburg kayisifuni nhlobo. Lokhu kubi ngoba singamakilabhu amele iKwaZulu-Natal kwi-Absa Premiership. Ngicabanga ukuthi ngabe kuhle ukuba sibambisene.
Nakuwona lo mdlalo esihlulwe kuwona ngo-2-0, abalandeli beTeam of Choice bese kucaca ukuthi abajabuleli nje amaphuzu amathathu kuphela ngoba bebememeza bethi siwahlulile AmaZulu.
Kushiya imibuzo eminingi ingaphenduleki ukuzwa umuntu ongumZulu ejabulela ukuthi into okumele ngabe iyigugu kuyena yehluliwe.
Phela ukweseka ikilabhu eholwa ngumuntu wolunye uhlanga kakuchazi ukuthi nawe kumele uzibone usuyilolo hlanga bese ubukela phansi okwesizwe samaZulu.
Kudumaza kakhulu-ke ukubona umnikazi wekilabhu engena agamanxe ezimpini zabadlali enkundleni. Lokhu kuyihlazo. Ngiyazi ukuthi abantu bangenza noma yini ukunqoba imidlalo, kodwa abalandeli bethu ngiyabathembisa ukuthi uSuthu luzoqeda kwi- top 8 zikhona zonke izithiyo. Ngithanda ukuncoma kakhulu abaqeqeshi nabadlali ngomsebenzi omuhle abawenzayo muva nje. Ukuhlulwa kanye emidlalweni eyisithupha akuyona into encane. Sizokwenza konke okusemandleni ukudlulela kuma- quarter final eNedbank Cup njengoba siqhathwe noBuntu Cape Town. Sizoyinika inhlonipho eyifanele le kilabhu. Ukushikiliswa wuMthatha Bucks kowe- last 32 kusikhombisile ukuthi kunzima ukubhekana namakilabhu adlala ezigabeni ezingaphansi kwesePremiership.
Ukufinyelela kumaphenathi kusivule amehlo ukuze siye kuBuntu sihlome siphelele. Ukufinyelela kowamanqamu walo mqhudelwano ngonyaka wezi-2010 kusinika ithemba lokuthi singakwazi ukudla ubhedu.
Sengisonga, ngithanda ukukhuthaza ukunqandwa kodlame kunobhutshuzwayo. Isimo sokulwa kwabadlali nokundiza kwenhlamba ephinyiswa ngezinye izikhulu kakunandawo kunobhutshuzwayo.
Nginxusa abalandeli bethu ukuqhubeka nokuphuma ngobuningi emidlalweni yethu ngoba sibheke ukuqeda kwi- top 8 kwiPremiership nokuqhubeka nokwenza kahle kwiNedbank Cup. Hebe! Usuthu! Hebe!