Benza ezibukwayo kumaCommonwealth
Abakuleli babuye nezindondo ezimbili kwiLong Jump
BENZE ezibukwayo abasubathi baseNingizimu Afrika beLong Jump uLuvo Manyonga noRaswahl Samaai bebuya nezindondo, eyegolide neyethusi ngokwehlukana kumaCommonwealth Game izolo ngoLwesithathu emini e-Australia.
UManyonga uye kule midlalo eyimfivilithi ngemuva kokuba ebuye nendondo yegolide kwi-International Association of Athletics Federation (IAAF) World Championships nyakenye eLondon kanti usanda kubeka irekhodi elisha lakuleli u-8.65.
Abanye abasubathi baseNingizimu Afrika abavelele kube nguCaster Semenya onqobe i-1500m kwathi u-Akani Simbine naye wagila izimanga enqoba i-100m ebekwe ezithendeni nguHenricho Brinjties wakuleli, kwathi imfivilithi uJohan Blake waseJamaica walala isithathu.
Kushone usuku lwayizolo ngoLwesithathu elakuleli selinezindondo ezingama-25, amagolide ayi-10, ezesiliva eziyisi-6 neziyisi-9 zethusi.
U-Anaso Jobodwana noClarence Munyai badlulele kowamanqamu kwi-200m kanti uJobodwana usinde emlonyeni wengwenya ecishe ekhishwa ngemuva kokuba kuthe uma kukhala isibhamu sokususa umjaho washibilika wawa kodwa onompempe bamnikezela isexwayiso sokuthi uma eke wenza elinye iphutha uyakhishwa.
UJobodwana noMunyai bazogijima kowamanqamu namuhla ngoLwesine ngo-13h50.
UMunyai usanda kugila izimanga ephula irekhodi lakuleli le200m.
Ngaphandle kwabagijimi nababhukudi benze kahle kakhulu kule midlalo lapho umbhukudi waKwa- Zulu-Natal uChad le Clos egile izimanga ehlomula ngezindondo ezintathu zegolide kwi-50m butterfly, 100m freestyle nakwi-200m butterfly.
Abanye ababhukudi abenze kahle kube nguCameron van der Burgh, uTatjana Schoenmaker ukubala nje abambalwa.
Umdlali wokuqala ophakamise ifulegi leNingizimu Afrika e-Australia kube ngomunye waKwaZuluNatal uHenri Schoeman ohlomule ngendondo yegolide kwiTriathlon. Nabasubathi abaphila ngokukhubazeka baziqoqa ubuthaphuthaphu izindondo.
Ukuqeda kwababhukudi kwenza abe mancane amathemba okuthi elakuleli lizokwazi ukubuya nezindondo ezingama-45 kanti osekuthenjelwe kubona ngabajijimi ikakhulukazi uCaster, uJobodwana, uMunyai ukubala nje abambalwa.