IPirates ithumele umyalezo oshubile
UMicho umincile kulimala uThembinkosi Lorch
UTHABO Qalinge we-Orlando Pirates okhumule ijezi, ushaye igoli lesibili elisize ezakhe zaqhubeka nokushisisa umbango wesicoco se-Absa Premiership zinqoba AmaZulu FC ngo-2-1 eKing Zwelithini Stadium, eMlazi. IBucs idlule kanzima oSuthwini obeluvutha lungabaselwe. Ibanga isicoco seligi neMamelodi Sundowns. Lapha uhalaliselwa ngozakwabo, okunguDiamond Thopola, Justin Shonga noLuvuyo Memela.
UMQEQESHI we-Orlando Pirates, uMilutin “Micho” Sredojevic, uthumele umlayezo oshubile kwiMamelodi Sundowns emuva kokuba ezakhe ziguqise AmaZulu FC ngo-2-1 kowe-Absa Premiership izolo ngeSonto ntambama eKing Zwelithini Stadium, eMlazi.
Amagoli okunqobe ngawo iBucs abekwe enethini nguMusa Nyatama ngomzuzu wama-33 noThabo Qalinge ngowama-82, kwathi eloSuthu lashaywa nguMabhuti Khenyeza ngowe-11.
Lo mdlalo ububhekwe ngabomvu ngabathandi bebhola njengoba iPirates ibidinga amaphuzu agcwele ukuze iqhubeke nokufaka ingcindezi kwiSundowns esesicongweni se- log. Njengamanje la makilabhu ahlukaniswe ngamaphuzu amathathu esicongweni.
USredojevic, oke waveza ukuthi abanendaba kangako ngesicoco seligi, uthumele umlayezo oshubile kwiDowns.
“Ngiyakuqonda ukuthi abalandeli bethu babona sinethuba lokunqoba isicoco seligi. Ngakhoke kufanele sikuhloniphe lokho, sizame ukubanika lokhu abakufunayo.
Isicoco asikho ezandleni zethu, iSundowns isibambe ngesandla esisodwa kodwa kufanele yazi ukuthi akuphelile, kusazoshuba.
“Kufanele yazi ukuthi nathi sifuna ukudlala kwiCaf ngoba i-Afrika ilinde iPirates. Ngeke size sivume isithathe kalula, sisazolokhu siphefumula eduze kwayo size sifike ekugcineni. Ngijabule ngendlela esibuye ngayo kulo mdlalo wamaZulu, esikwenzile kuyizinkomba zokuthi kukhona esingakwenza ngesicoco seligi. ISundowns ingacabangi ukuthi sekuphelile, yima kuqalwa,” kusho uSredojevic.
Uthi AmaZulu abanike umdlalo oseqophelweni eliphezulu.
“Besazi ukuthi siza esifundazweni lapho elithandwayo khona ibhola, yingakho bekufanele silinyuse igiya.
"Asibanga nomdlalo omuhle ngesiwombe sokuqala besiphisana ngebhola. Yingakho AmaZulu esibambile ashaya igoli kuqala. Asijulukisile. Ngikholwa wukuthi unozinti wawo bekufanele akhishwe ngekhadi elibomvu ngesikhathi edlalisa kabi uThembinkosi Lorch.
Kodwa akusenani ngijabule ngoba abadlali bethu bakhombisile ukuthi badlalela ukuhlonipha ibheji nabalandeli,” kusho uSredojevic. Uthi ubambe umoya ngoLorch obhinyilike ihlombe. Uthi umincile kungabi yinto ezomhlalisa ngaphandle isizini yonke.
UCavin Johnson ocija uSuthu, uthi bekungafanele bahlulwe kulo mdlalo.
“Bekufanele sithole iphuzu okungenani kulo mdlalo sabayeka. Isiwombe sokuqala besisithwele sakha inqwaba yamathuba sangawasebenzisa.
Isiwombe sesibili kube ngesabo bawasebenzisa namathuba. Into esishaye kakhulu yisipiliyoni, abadlali bethu abaningi abakujwayele ukudlala kulolu hlobo lwemidlalo lapho inkundla igcwele khona phama. Nokho sizo- jwayela ngokuhamba kwesikhathi,” kusho uJohnson.
Isiyonke imiphumela ye-Absa Premiership imi kanjena: Chippa 1, Ajax 1; Baroka FC 0, Maritzburg 2; Chiefs 1, Platinum 0; AmaZulu FC 1, Pirates 2; Cape Town City FC 0, SuperSport 0; Sundowns 2, Wits 0; Free State Stars 1, Celtic 1.
EyeNFD: Royal Eagles 0, Jomo Cosmos 0; Spurs 2, Leopards 0; UThongathi FC 1, UBuntu 1; Mbombela 0, Stellenbosch FC 2; Tshakhuma 1, Real Kings 1; Pretoria University 4, Cape Town All Stars 3; Richards Bay 1, Super Eagles 2; Highlands Park 3, Mthatha Bucks 0.