UMUNTU NGEKE UM- CONFIRME NGEMPELA
ABANTU baxaka njengomuntu ofuna kufakwe ama- speed hump ku- freeway, ngisho nosaziwayo imbala.
Ngake ngakhuza abanye nje osaziwayo abangabaculi bevikela uJulius Malema ngesikhathi ekwiAfrican National Chordless Youth League (ANCYL), kuvela ukuthi unomuzi ongalifanele iholo lakhe. Bona babethi kunani ngoba nabelungu babeyidla imali. Kuthe esekwi-Economic Freedom Fliers, baqala bamgxeka sengathi nguyena owathi uSathane makabe yisitha sikaNkulunkulu.
Ngavele ngabona nje ukuthi bekumane kuyisaphothi yophuthu, babemeseka ngoba begaqele ukuqashwa yi-ANC ukuba bayocula uma inemicimbi - ufice abaholi bayo abangamakhehla nezalukazi befequza esteji.
Ngisho ngenhliziyo ngithi ngiyibekile i- arthritis, umuntu uzobe esekhala ngembulukhesheni ebusuku, amadolo esethi awudanse game two sibone.
Uze ubone nje ukuthi abantu bayaxaka, ngeledlule kuphume i- documentary kaNkk Winnie Madikizela-Mandela, abanye abayibukile ububezwa bethi uMnu Nelson Mandela wadayisa ngoWinnie, bethi sebeyabona manje ukuthi babethanda uMandela o- wrong!
Ngibheja ngemicondo yami, ku- zophela 10 years kuvele okunye ubezwe sebethi:
“Hhayi sesiyabona ukuthi impela nguWinnie Ntshaba (owayenguKhethiwe kwiGenerations) uWinnie o- right, hhayi lo wakwaMadikizela.”
Umuntu ngeke um- confirme kwazisholo uBrenda Fassie emuva kwalokho waziyela eZululand - kubo kaJesu. Abantu bahamba neziwinayo.
Niyongibuza ningiphale ulimi, mhla kwakhothama iNkosi Mangosuthu Buthelezi - phela thina makhosi kasishoni, siyakhothama - kuyovela amanye ama- documentary, uzwe abantu sebethi:
“Hhawu kanti Chief Man go Sooth Boothless was smeared with the broth, he did not taste the meat!” Bonke laba ababethi uyi- political vendor, ungumdayisi, bayobe sebemthandisa okwemali ngoba esesegodini - ungazi ukuthi ingane kaBaby Magogo yayidayiseni, kabani, kubani.
Uma phela kukhona abane- proof yokuthi yadayisa, mabaveze izili-
Hhayi sesiyabona ukuthi impela nguWinnie Ntshaba, uWinnie o-right...
phu phela sibone. Singathini-ke, abantu sebencoma noma bagxeke abanye ngoba benzela ukubukwa ukuthi ngabe isiNgisi sabo singama Megabytes or amaGigabyte yini.
Abanye sebebulawa yilo mkhuhlane okuthiwa yi- tender fever, uke ungamncomi nje umholi weqembu elithile lezepolitiki, ngeke uyinuke i- anti-tenderviral.
Indlala efike nalo hulumeni wethu ozishaya uNkulunkulu weManna okuthiwa yawela abaNtwana bakwa-Israel ehlane, yenza abantu benze izinto ezidida uGoogle.
Ngike ngaya kwenye indawo yabadla izambane lika-2 randi laphaya eThekwini simenywe yiSuperSport iyosibusisa, sadlala nale nto okuthiwa yi- sport quizz, sibuzwa ukuthi kwakungubani u- goalkeeper wasoNgoye High School ngo-1993 - ngabatshela ukuthi kwakunguMadampi waphesheya kweNkonjane, ngakithi KwaDlangezwa.
Bekumnandi ngendlela emangalisayo ngazizwa ngiyiSilo sasemaChunwini ngempela. Kusuke laba bafana ebengihamba nabo ngathi uma ngifuna ijusi, batshela intombazane ebisiweta ukuthi mayinginike le jusi enegama lomfana womlungu - kangisazi noma nguJack, uMorgan or uJameson.
Ngithe uma ngiyifaka nje emlonyeni, kwangathi ngiphuza umuthi wokuphalaza othakwe ngesibhaha. Bangitshele ukuthi mangibekezele ngiyiqede ingilazi, nempela ngayishayela ekhanda ngezwa igazi linyusa i- speed - i- volume yazinyukela automatically.
Hhawu-ke kwavuka ubugagu ngafuna ukukhipha isibhongo sokuthi ngesaba ukushela iziphalaphala zangakithi o-Isabel Nsele, Nomvuzo Mjadu - belated happy birthday ntonjazana njengoba ubuzalwa ngoMgqibelo - Delisile Ndimande noJabulisile Ndlela engangifunda nabo u-form 1 oNgoye High School.
Ngibingelele enye intokazi, yavuma. Ngibe sengiyitshela ukuthi hhiya, yinhle sengathi nguMarcia Turner wodumo lweLux - yadideka intombi ngoba phela yayingekho i-tv kubo ngaleso sikhathi salabo nobuhle bamazwe ngamazwe; oMarcia Turner noRobin Townsend - nathi nje sasiyinkashela kwamalume omncane.
Ngiyitshele ukuthi yinhle ingikhumbuza izintombi zangakithi KwaDlangezwa, yangibuka yamamatheka. Ngicele inombolo yayo kamakhalekhukhwini, yangitshela ukuthi inombolo yayo iyabiza, wu-R100 inombolo iyinye - njengoba zili-10 nje.
Ngikhuze ngababaza ngasho ngenhliziyo ngathi:
“I- price yale nombolo isingaphezu kwe- inflation, sengingakhipha inkulungwane yonke yamarandi ngenombolo kamakhalekhwini sengathi yistolimende seToyota Tazz!”
Kuthe noma sengithi ngicela i- discount ka-zero ngoba ngiyawazi, yathi kulungile kodwa yona izofaka iZuma Added Tax (ZAT) kulezi eziyisi-9 - okusho ukuthi besengizokhokha uR1 035. Ngivele ngabona ukuthi hhiya, kanti kunje ezindaweni zabadla izambane likathurandi, le ndlala eyafika nohulumeni nakhona ibhokile, nansi intombi ifuna ukuceba ngami.
Yakhuluma ijusi engiyiphuzile, yathi:
“Cha ntombi sengibuye ngakhumbula, mina nginomfazi futhi uyisangoma wathwasa olwandle.” Ivele yahamba yangabe isabheka emuva, ngasho ngathi:
“Hamba Rev Mkhekhelezi, amanga akho akusindisile, ungathi uvele uzidonsela ngophalafini njenges’phefu ngasemalini usuzoqothulwa emaThekwini!” Hikhensile ngopfu ma-Afrika!