Basahlalelwe yijoka abagijimi bakuleli
Sekumele balungiselele iWorld Cup eseLondon
UBONA besahlalelwe wumsebenzi omkhulu abagijimi bakuleli u-Aleck Skhosana, onguMengameli we-Athletics South Africa (ASA) yize begile izimanga emidlalweni yamaCommonwealth eqale ngeledlule yasongwa izolo ngeSonto eGold Coast, e-Australia.
Elakuleli libuye kule midlalo lilele endaweni yesi-6 emhlabeni.
Abasubathi bakuleli baqoqe izindondo zegolide ezili-13, bazuza ezili-11 zesiliva nezili-13 zethusi. Zibe ngama -37 sezizonke. Lemidlalo inqotshwe y iAustralia, isibili k w abayi-E n gland, i-I ndi ayalala i sithathu kwathi iCanada yaba yisine, iNew Zealand yaqeda iyisihlanu.
Ezokugijima zenze kangcono kakhulu uma kuqhathaniswa nasemidlalweni edlule ebiseScotland lapho ababuya khona neziyisi-9.
Nonyaka abagijimi babuye nezindondo ezili-14 kwathi ababhukudi bahlomula ngezili-12.
ISouth African Sports Confederation and Olympic Committee (Sascoc) idalule ukuthi umsubathi othole igolide uzothola u-R50 000, abahlabane ngezesiliva kube ngu-R25 000 kuthi abethusi kube ngu-R12 500 indondo iyinye.
USkhosana uthi usemkhulu umsebenzi ohlalele abagijimi nonyaka. Uthi njengoba bebuya e-Australia, kuzofanele balungiselele imidlalo ye-Athletics World Cup ezokuba ngoNtulikazi (July) eLondon. Le midlalo idlalwa ngamazwe ayisi-8 avelele kwezokugijima emhlabeni, kanti izwe ngalinye lithumela umgijimi ngamunye ibanga nebanga.
“Ngibabongela bonke abadlali abenze kahle kumaCommonwealth anonyaka.
Ezokugijima zingigeze igilo njengoba zibuye nezindondo ezili-14. Senze kangcono kakhulu kunangowezi-2014 eScotland lapho esabuya khona neziyisi-9.
Yize abagijimi benze kahle kodwa usemkhulu umsebenzi osasihlalele njengoba kuzoqala imidlalo yeWorld Cup.
Kule midlalo izwe kumele lihambise umdlali oyedwa ovelele ibanga nebanga.
Sesisikhiphile isikwati esiya eLondon kanti sekulele kubasubathi ukuba basebenze kanzima ukuze kugcine kusale oyedwa kulelo nalelo banga,” kusho uSkhosana.
I-ASA iqoke abasubathi abangaphezulu kwama-50 abasazohlungwa ukuya eLondon.
Nokho kakungatshazwa ukuthi bazokube bekhona uCaster Semenya ophule amarekhodi amathathu kumaCommonwealth, u-Akani Simbine obe ngumsubathi wokuqala waseNingizimu Afrika ukudla ubhedu kwi-100m noLuvo Manyonga kwiLong Jump.
Umsubathi okungakacaci ukuthi uzokube ekhona yini kule midlalo nguWayde van Niekerk osalulama, ophethe irekhodi lomhlaba kwi-400m.
Amazwe azogadulisana kulo mqhudelwano yiGreat Britain and Northern Ireland, i-United States of America, iChina, iSouth Africa, iFrance, iGermany, iJamaica nePoland.