ONOMPEMPE BASINDISWE NGAMAPHOYISA KUBALANDELI
ONONDWEBA baphume ngamaveni amaphoyisa kukubi emuva kokuba abalandeli bebesho ukuba- dla luhlaza, bebasola ngokubamba inkunzi ikilabhu yabo.
IRichards Bay FC iguqiswe yiSuper Eagles ngo-2-1 koweNational First Division (NFD) ngo- Mgqibelo ntambama eMhlathuze Sports Complex, eRichards Bay.
ISuper Eagles iqede lo mdlalo ingasaphelele kukhishwa ngekhadi elibomvu u-Anver Esterhuizen ngomzuzu wama-37.
Umthombo weLANGA obukhona emdlalweni, kawuwuvali umlomo ngendlela othi iBay ibicindezelwe ngayo ngonondweba abebephethe umdlalo.
Kuthiwa igoli lokuqala leSuper Eagles obekuyiphenathi, kudlaliswe kabi umdlali ngaphandle kwebhokisi, unondweba nabasizi bakhe balikhomba emlotheni.
Kuthiwa umdlalo usuyophela onondweba bashayelele isipikili sokugcina bebeka igoli obekucaca ukuthi yi-offside.
Kuthiwa umsizi kanondweba uke waliphakamisa iduku wabuye walehlisa okwenze kwathikamezeka izitobha zeBay, kwaqhuma igoli. Lesi sigameko kasehlanga kahle kubalandeli beBay njengoba kuthiwa bebesho ukubadla babafele onondweba.
Kuvela ukuthi bahlale ezindlini zokushintshela amahora angaphezulu kwamabili baze baphuma sebephelezelwa ngamaphoyisa kukubi.
“IPremier Soccer League (PSL) kuzofanele iyisukumele indaba yonondweba ikakhulukazi emidlalweni emqoka njengalona ngoba kuzogcina kuphume isidumbu ngendlela amakilabhu abanjwa ngayo inkunzi.
"Nangeledlule, omunye walaba onondweba wenze iphutha elifanayo erobha yona iBay idlala noMthatha Bucks, eMthatha.
“Emuva komdlalo uxolisile ezikhulwini zeBay.
"Ukuphindile futhi nakulo mdlalo weSuper Eagles, uphinde uyaxolisa futhi.
"Le nto iyinkinga, kuzofanele isukunyelwe ngoba iBay uma ingagencwa yizembe izolahlekelwa ngokuningi kodwa onondweba abenze amaphutha bazoqhubeka nokusebenza,” kusho lo mthombo.
Imizamo yokuthola uSifiso “Jomo” Biyela ongumnikazi weBay ukuba aphawule ngokwenzekile ayiphumelelanga njengoba ucingo lwakhe belukhala kodwa lungabanjwa.
Kuthiwa naye simnengile isenzo sonondweba kangangoba uyasola ukuthi kukhona abamakhela itulo lokuthi ikilabhu yakhe iphume kulesi sigaba.
Nokho kuthiwa uzimisele ngokulwa kuze kube sekugcineni ukuze ikilabhu yakhe isinde ezembeni.
USolwazi uRonnie Schloss oyiChief Operations Officer (COO) yePSL, uthi bazolinda umbiko wonondweba yiwona ozobazisa konke okwenzekile bese benquma.