IBucs kayiyiqwashisi iSundowns ngeseligi
UMosimane unenjongo ngeChampions League
UPITSO “Jingles” Mosimane ongumqeqeshi weMamelodi Sundowns uzwakalise ukuthi kayimqwashisi ngisho elele i-Orlando Pirates eseyisele nezakhe embangweni wesicoco se-Absa Premiership.
IDowns iguqise iBidvest Wits ngo-2-0 koweligi ngoMgqibelo kusihlwa eLoftus Stadium, ePitoli.
Amagoli eDowns abekwe enethini nguThemba “Mshishi” Zwane noSibusiso “Villa” Vilakazi.
Lo mphumela wenze iDowns yahambela phezulu njengoba ikholwa wukuthi izosibuyisa isicoco sayo seligi esihlwithwe yiWits ngesizini edlule.
UMosimane uthi iBucs kayimuqwashisi ngisho elele.
“Sinezinhloso ngale ligi. Sifuna ukudlala kwiCaf Champions League iminyaka emine ilandelana.
"Lo mphumela ubumqoka ngendlela eyisimanga ukuze sizibone ukuthi sibheke kuphi. Kanginandaba nePirates ukuthi yenzani, mina ngibheke okwami. Kunezinto engizibonile kulo mdlalo ezingangichazanga.
“Ngesinye isikhathi sifuna ukuthi size siyongena nebhola enethini nalapho okufanele ngabe sikhahlelela khona ipali. Kodwake ngijabule ngomphumela,” kusho uMosimane.
ISundowns kuzokuthi kusasa ngoLwesibili ngo-19h30 ibhekane neLamontville Golden Arrows kowe-Absa Premiership eLoftus Stadium.
UMosimane ephawula ngalo mdlalo uthe: “Akukho ukujikela emuva, kufanele siwunqobe lo mdlalo.
"Awusekho umdlalo olula manje abantu balwela impilo yabo. Kuzofanele sisebenze kulo mdlalo, yingakho ngisheshe ngabakhipha abadlali abanjengoVilakazi ngoba angifuni basindelwe ngamamase- la.
"Angiyena umuntu okhonze ukushintshashintsha isikimu yingakho kufanele ngibavikele abadlali bami.”
UGavin Hunt ocija iWits, uyivume njengendoda induku.
“ISundowns ibingcono ngayo yonke into kunathi akukho engikhala ngakho sihlulwe kufanele,” kusho uHunt.
Awusekho umdlalo olula manje, abantu balwela impilo yabo.