UBHEKWE NGABOMVU UMHLANGANO WE-SAFA
IBHEKWE ngabomvu i-Extra Ordinary Congress yeSouth African Football Association (Safa) ezohlala ngoMgqibelo womhla zingama-28 kwephezulu eSandton Convention Centre, eGoli.
ISafa bekumele ikhethe ubuholi obusha ngenyanga edlule kodwa lokhu akwenzekanga ngenxa yokuthi kunezinto ebezingalandelwanga.
Izifunda zithunyelelwe yonke imininingwane ngokuzobhungwa ngakho kwi-Extra Ordinary Congress.
Phakathi kokunye, wukubuyekezwa kwenqubomgomo yokhetho lwale nhlangano, wukwamukelwa kwamalungu ekomidi lokhetho nokuqokwa kwenkampani yabacwaningi mabhuku.
Inqubomgomo yeSafa, ikubeka kucace ukuthi ikomidi lokhetho kumele liqokwe kusasele izinyanga eziyisi-6 kuqokwe ubuholi obusha.
Nokho-ke kunomoya ovunguzayo wokuthi njengoba kuzobuyekezwa inqubomgomo yokhetho, kungenzeka kushintshwe lokhu, bese lukhishwa kulo mhlangano usuku lokukhetha ubuholi obusha.
Lolu khetho lubukeka lusazophonselwa inselelo njengoba kunenqwaba yezifunda ezinotwayi. Kuthiwa KwaZulu-Natal, uma lingabalwa iTheku elinezinkinga, zimbili kuphela izifunda ezisemthethweni, ezinelungelo lokuba yingxenye yomhlangano wokukhetha ubuholi obu- sha. Lezi zifunda yiSafa AmaJuba neSafa uThukela.
Kuthiwa ezinye zikhethe ubuholi obusha kuxhanyazelwa kwangalandelwa inqubomgomo yeSafa yokukhetha kwazise kuthiwa kunabaholi abebekhethwa ngokuphakanyiswa kwezandla okuyinto engekho emthethweni.
ISafa uMkhanyakude kayikabukhethi ubuholi obusha ngenxa yokudonsisana. Kunabaholi abafake amadispute kwiSafa kuzwelonke bekhala ngendlela engahlelekile okukhethwe ngayo kwezinye izifunda.
UTebogo Motlanthe woPhiko lwezoMthetho kwiSafa, ubeKwaZuluNatal ngeledlule ukuzozwa izikhalo zala malungu afake ama-dispute. Ebuzwa uMotlanthe izolo ngeSonto ukuthi uthele ziphi izithelo umhlangano, uthe: “Usihlalo weMembership Affairs yeSafa, uXolile Nkompela, uzokhipha isitatimende ngalolu daba kusasa (namuhla ngoMsombuluko). Lesi sitatimende sizokube siqukethe zonke izifunda ezithintekayo kuhlanganisa nezangaphandle kwaKwaZulu-Natal.”
Inkulumo kaMotlanthe kayethusi njengoba naseFree State kuvela ukuthi yiMangaung Region kuphela esemthethweni ezifundeni eziyisihlanu ezikhande lesiya sifundazwe. Ukungalungiswa kwesimo sezifunda, kungaholela ekutheni iSafa iphonselwe inselelo, bese kuba namathuba amaningi okuthi ukhetho luthathwe njengolwasehlathini.