UKomphela usikaza ukuyosebenza eBenin
Ushela umqeqeshi we-Arrows ukumjoyina
USTEVE “Mphathi” Komphela ongumqeqeshi weKaizer Chiefs weshela umqeqeshi weLamontville Golden Arrows ukuba baphinde basebenze naye njengoba kuvela ukuthi angase ajoyine iqembu lesizwe laseBenin. IChiefs iguqise iPlatinum Stars ngo-1-0 wegoli likaPule Ekstein alishaye ngomzuzu wama-49 kowe-Absa Premiership izolo ngeSonto eFNB Stadium, eGoli.
UKomphela usenuka iqaqa kubalandeli beChiefs njengoba bengasamufuni nalapho enyathele khona.
Isizathu salokho wukuthi iChiefs kayikhiqizi imiphumela egculisayo njengoba sekuphele amasizini amabili nesigamu ingakaze inqobe nkomishi ngaphansi kwakhe. Iyaphela inkontileka yakhe ngokusongwa kwesizini.
Kukhona abalandeli abalibe- ka ngesihloko elokuthi basahoxile ukulandela iChiefs kuze kube uyahamba uKomphela. Kuvela ukuthi useyinikiwe incwadi emkhululayo, usebenza useyazi ukuthi ngeke ayinikwe inkontileka entsha.
ILANGA lihletshelwe ngumthombo walo oncikene noKomphela ukuthi ushela uMandla “Mhloli” Ncikazi ongumsizi kaClinton Larsen ocija i-Arrows. Ufuna ukuba ahambe naye ukuyosebenza eBenin.
Kuzokhumbuleka ukuthi uKomphela ubemfuna uNcikazi ukuba bazosebenza naye kwiChiefs kodwa akwangalunga. Ubechazwa yindlela abasebenze kahle ngayo ndawonye kwiMaritzburg United.
“UKomphela namanje uyakhala ngokuthi ukuba wamthola uNcikazi ukuzosebenza naye kwiChiefs ngabe izinto zihambe kahle.
"Manje akafuni ukulenza iphutha, ufuna ukuhamba naye uma kuwukuthi uyawuthatha umsebenzi waseBenin. NeSuperSport United kuthiwa iyamfuna uKomphela futhi nakuyona kungenzeka ahambe noNcikazi ngoba akasazimisele ngokusebenza ngaphandle kwakhe,” kusho lo mthombo.
UNcikazi ebuzwa ngalolu daba, uthe: “Ngike ngambuza uKomphela ngendaba yaseBenin wakubeka kwacaca ukuthi ingamampunge.
"Ngiyazi ukuthi angakujabulela ukusebenza nami kodwa lapha engikhona ngijabule, ungiphethe kahle usihlalo wekilabhu uMato Madlala.
“Okwamanje ngisasebenza kwi-Arrows, okunye okushiwo ngami ngikuthatha njengamampunge, angikaze ngithintwe muntu ngendaba yaseBenin yize ngazi ukuthi uKomphela usazimisele ngokuphinde asebenze nami.”
Imizamo yokuthola uKomphela ukuba aphawule ngalolu daba iphunzile.