OWE-DA UKHUMBULE EKHAYA EGUBHA OLOKUZALWA
KUHLANGANE amalungu amaqembu ezepolitiki ahlukene ngesikhathi umholi weqembu eliphikisayo KwaZulu Natal, uMnu Zwakele Mncwango, egubha usuku lwakhe lokuzalwa endaweni yokujuxuza iRocafella KwaNongoma ngoLwesihlanu ebusuku.
UMnu Mncwango uqale usuku lwangoLwesihlanu ngokuyonikela esikoleni samabanga aphansi ayefunda kusona iMangqwashu Primary eDlabe esigodini KwaMandlakazi.
Kulesi sikole uMnu Mncwango uthengele bonke abafundi abafunda kusona izicathulo zesikole.
Utshele ILANGA ukuthi ayikho into eyehlisa umfutho wokufunda kumfundi njengokuba nento engahambi kahle empilweni yakhe.
“Izingane eziningi azinazo izicathulo zesikole, yingakho ngimane ngagxila ekubeni ngithengele wonke umfundi izicathulo.
"Angikhethanga ukuthi unazo yini umfundi izicathulo noma cha,” kusho uMnu Mncwango, enanela ngokuthi ukugubha usuku lwakhe lokuzalwa ngalolu hlobo sekuzoba yinto yaminyaka yonke.
“Ngizohambela izikole ezahlukene KwaNongoma, ngisize ngalokho isikole esizobe sikudinga ngalowo nyaka,” kusho lo mholi odabuka khona KwaNongoma.
Uthi abekwenza ubengakwenzi njengosopolitiki kodwa njengesakhamuzi sakhona KwaNongoma, futhi nokuyindawo akhulele kuyona.
Ntambama ngoLwesihlanu, izinkumbi zabathandi bobumnandi okuhlanganisa nezikhulu zamanye amaqembu ezepolitiki, zihlangane endaweni yokujuxuza, iRocafella, zabungaza nalo mholi.
Kulo mcimbi kunandise isilomo somsakazi woKhozi FM, uSipho Sgqemeza Mbatha, DJ Maku, DJ Lindani nabanye bendawo.