I-CHIEFS IGAQELE ISILOMO SE-AJAX
Igaqele nesilomo seJomo Cosmos esibizayo
IKAIZER Chiefs okungenye yamakilabhu ahlonishwayo ebholeni lakuleli ishela umdlali we-Ajax Cape Town ngenhloso yokuvala isikhala sikaTsepo “Chester” Masilela eziya ngokuqina izinsolo zokuthi ngeke yelulwe inkontileka yakhe.
IChiefs kayizange ibe nesizini enhle njengoba iphele ingazange inqobe nkomishi. Empeleni sekuphele amasizini amathathu ingakaze inqobe inkomishi ngaphansi kwePremier Soccer League (PSL).
USihlalo wayo, uKaizer Motaung, ukubeke kwacaca ukuthi bazokhuculula lonke uvucu bese belanda abanye abadlali. Leli phephandaba lithole ukuthi iChiefs yeshela uMusa Lebusa ongukaputeni we-Ajax Cape Town ngenhloso yokuvala isikhala sikaMasilela ophelelwa yinkontileka uma kusongwa uNhlangulana (June).
Kuthiwa iChiefs isinqumile ukuthi ngeke iyelule inkontileka yalo mdlali.
“IChiefs isinqume ukuthi ivele ifune umuntu ozovala isikhala sikaMasilela ngoba ngeke isamudinga. Ikhala ngokuthi uhola kakhulu kanti enjalo nje uhlushwa wukulimala. Ifuna uLebusa ongukaputeni we-Ajax. Okubi nje wukuthi imubanga neMamelodi Sundowns.
“Inkinga wukuthi abadlali beAjax basebumnyameni ngekusasa labo njengoba kusenecala elifakiwe elithinta uTendai Ndoro.
“Usanenkontileka ne-Ajax uLebusa kodwa akazimisele ngokuyodlala kwiNational First Division. Uzohamba uma kuwukuthi le kilabhu igcina ngokuya ehlathini,” kusho lo mthombo. ILANGA libuye lathola ukuthi iChiefs ingase ihlukane netshe lemali njengoba ifuna uTebogo “Messi” Tlolane ogijima kwiJomo Cosmos ematasa nemidlalo yokuhlungela ukunyukela kwi-Absa Premiership.
UTlolane ufaniswa noLionel Messi wase-Argentina ogijima kwi- Barcelona yaseSpain.
Leli nxele like laba sematheni ngesizini esanda kusongwa liya eSpain lapho belimenywe khona yiBarca ngenhloso yokulihlola bese ilisayinisa.
Nakuba uTlolane eyiphasile inhlolokhono kodwa ugcine engasayinanga neBarca. Umataniswa neChiefs nje, uJomo Sono ongumnikazi weCosmos ukubeke kwacaca ukuthi ofuna lo mdlali uzohlukana netshe lemali.
IChiefs uma kuwukuthi iyamdinga kuzofanele iyeke ukugodola nemali njengoba idume kanjalo.
“IChiefs isebenza buthule. Ifuna lo mdlali azovala indawo kaMichelle Katsvairo osendleleni,” kusho umthombo. Leli phephandaba lishayela uSono ngalolu daba izolo ngeSonto emini yasekuseni, uthe okwamanje ngeke akwazi ukuphawula ngalezi zindaba ngoba usesontweni.
UBobby “Bobsteak” Motaung oyiMenenja-jikelele yeChiefs ebuzwa ngalolu daba, uthe bazomemezela uma sekukhona abakwenzile.
Nokho uvumile ukuthi kukhona abamatasa ngakho okuthinta izinguquko ekilabhini.