Usulala obenyoni umndeni ohlaseliwe
Banovalo lokubuya kwabasolwa bezobaqedela
USUWESABA nokulala emakhandleleni umndeni wakwaMbatha, eMatabetulu, eNanda, emuva kwesigameko sokudutshulwa kubulawe umama nendodakazi yakhe ngoLwesine ebusuku.
Kubulawe uNkz Nonzuzo Mbatha (36) noNkk Nomusa Mbambo (56) okubikwa ukuthi bebengofakazi ecaleni elibhe- kene noMnu Nkosi Ngcobo obeyisosha, osolwa ngokuhlasela lo mndeni ngoba esola unina wengane yakhe, uNkz Nontobeko Mbatha, ngokujola.
Kulesi sigameko kuthiwa uMnu Ngcobo usuke enkanjini yamasosha e-Upington, eNorthern Cape, wafika kwaMbatha wadubula wabulala uNkz Thandi Mbambo (19) wabuye walimaza noNonzuzo.
Esigamekweni sangoLwesine, kuthiwa kugasele amadoda amabili angaziwa abefake amajakhethi, afike afuna uNonzuzo okuthe uma ekhonjwa, amlalisa phansi yena noNkk Mbambo maqede abadubula emakhanda.
UNontobeko yena usindile, lokhu kwenzeke phambi kwakhe, kodwa abasolwa bamyeka. Kubikwa ukuthi uNontobeko uthathwe ngamaphoyisa wayobekwa lapho kungazi khona muntu ngenhloso yokumvikela. ILANGA lifike kwaMbambo kunamakholwa abehambise umkhuleko. Okufike kwavela kulo mndeni, wuvalo onalo njengoba uthi kawazi ukuthi abasolwa bangabuya yini beyobaqedela. Uthe sewesaba ngisho ukulala emakhandleleni, ukuba kuya ngawo ngabe usuyagadwa.
UMnu Mxolisi Mbambo obekhona naye kwenzeka isigameko, uthi usekude ukuyikhohlwa into ayibonile. Uthi uzwe kuqhuma isibhamu esendlini yakhe. "Ngiphumile ngiyobheka ukuthi kwenzekani ngabona amadoda amabili ephuma endlini ezihambela sengathi kakwenzekanga lutho.
"Ngimemeze omakhelwane ngicela ukuba basisize. Ngaleso sikhathi, la madoda aphendukile ngasesangweni ama angibuka maqede aqhubeka nendlela engabaleki. Ngingene endlini ngabafica sebeshonile bobabili,” kusho yena.
Uthi uNonzuzo ubulawa nje, isandla sakhe bese singasebenzi njengoba ngonyaka odlule edutshuliwe. Uveze ukuthi kwenzeka lokhu nje, babekade becelile emaphoyiseni ukuba bagadwe emuva kokuhlaselwa kwabo.
UMnu Sduduzo Khuzwayo, oyikhansela kule ndawo, uthi babuhlungu ngento eyenzeke emndenini wakwaMbambo.
Uthi bazokwenza isiqiniseko sokuba amaphoyisa ayabakhona ngelanga lomlindelo nangelomngcwabo. Okhulumela amaphoyisa kwaZuku-Natal, uCol Thembeka Mbhele, uthe kuvulwe amacala amabili okubulala, bekungakaboshwa muntu. Mayelana nokugadwa komndeni ngelanga lomlindelo, uthe umndeni kuzomele ubhalele umphathi siteshi incwadi ucele ukuba akhiphe amaphoyisa azogada. "Udaba lubucayi, amaphoyisa angakhishwa ukuyoqapha isimo,” kusho yena.