UKHALE NGOKUZIPHATHA KOBUHOLI BE-ANC
UMENGAMELI weNkatha Freedom Party (IFP), iNkosi Mangosuthu Buthelezi ( osesithombeni), utshele abantu baseNkandla ukuthi uzwa ubuhlungu ngenxa yokuthi igama lale ndawo liphenduke inhlamba eNingizimu Afrika ngenxa yendlela engenasimilo yobuholi, uMnu Jacob Zuma, obengumengameli wakuleli aziphathe ngayo neqembu lakhe, i-African National Congress (ANC) benqaba ukuba kuhlaselwe inkohlakalo.
Ukusho lokhu izolo ngeSonto ngesikhathi i-IFP ikhankasela ukhetho lokuchibiyela ku- ward 7 ngaphansi kukaMasipala waseNkandla, oluzoba ngoLwesithathu. Leli qembu lihlasela ngoMnu Sikhumbuzo Khumalo kulolu khetho. “Bekuthi uma abantu bethi ‘iNkandla’ bebesho ukuthi ‘kulapho inkohlakalo yantshontsha khona eNingizimu Afrika’.
Kakumangalisi ukuthi kukuyo le ndawo lapho izakhamizi zakhona zibize i-IFP ukuba izihole ngoba ubuqotho baleli qembu bukhanyisa okwesikhonkwane esinganika ithemba,” kusho iNkosi Buthelezi. Ithe iNkandla isiphenduke indawo enokukhanya kwethemba - ngenxa yeIFP. “Indlela yokuqinisekisa ikusasa lokuphathwa kahle kukahulumeni wasekhaya lapha eNkandla, wukuvotela i-IFP.
"Isikhathi esiningi iningi labantu lithatha izinketho zokuchibiyela kube sengathi kazibalulekile njengezohulumeni basekhaya noma ezikazwelonke njengoba bengenzi imizamo yokuya ezikhungweni zokuvota. Izinketho zokuchibiyela zivame ukuguqula umdlalo, zinyakazise isimo samandla kumasipala,” kusho iNkosi Buthelezi.
Itshele abebethamele inkulumo yayo ukuthi abazokwenza ngoLwesithathu ku- ward 7, kuzoqhakambisa wonke uMasipala wesiFunda iKing Cetshwayo. Igcizelele ukuthi kumqoka kakhulu ukuba abantu abakhethelwa ubukhansela kube ngabakufanele “bafanele ukuba ngabasekwe yiqembu elinemigomo enobuqotho”.
INkosi Buthelezi kayiyishiyanga ngaphandle indaba esegudwini yombiko womcwaningi-mabhuku ophume ngeledlule. “Udalule ukuthi ukusetshenziswa kwemali ngokungajwayelekile kukhuphuke ngo-75%. Ukuchithwa kwemali kwenyuke kusuka ku-R16 billion kwaya ku-R28 billion. Ningacabanga-ke umonakalo owenziwe lapho, isiswenya semali engaka sifana nesiphoswe sahamba namanzi epayipini lemfucuza!
"Kumanje imali ihambile, kodwa izinkinga zisele. Ukunakekelwa kwemali okunqala, ngesinye sezikhonkwane zokuphatha kahle kohumeni basekhaya, kungakho i-IFP igxilise izinkambiso zayo ekuphatheni uhulumeni ohlanzekile,” kusho iNkosi Buthelezi.
Kunalolu khetho nje, kuvuleke isikhewu ngokushona kukaMnu Mphumzeni Mthombeni ngokuqala konyaka. UShenge uzwakalise ukudabuka ngokudlula kwakhe.