KUSATSHISWE ABACWANINGI BAHOXA
UMNYANGO wezokuBusa ngokuBambisana nezoMdabu KwaZuluNatal, oholwa nguNkk Nomusa Dube-Ncube, uthi uzimisele ngokuluphenya kabanzi udaba lokuhoxa ngemuva kokwesatshiswa kwabacwaningi-mabhuku kuMasipala weTheku.
Lokhu kuvezwe yilo mnyango esitatimendeni osikhiphe ngoLwesihlanu ngemuva kwemibiko ethi ihhovisi lomcwaningi-mabhuku KwaZulu-Natal, libhalele abaphethe uMasipala weTheku, libazisa ukuthi selikhethe ukuhoxisa izisebenzi zalo ebezicwaninga kulo masipala ngenxa yezingcingo ebezibesabisa futhi zisongela lezi zisebenzi.
Ngeledlule, uMnu Vincent Smith, oyilungu lephalamende noMnu Thembekile Makwetu, ongumcwaningi-mabhuku, ba- tshele abezindaba ukuthi lezi zinsongo zikhona ngempela, kakuwona nje umdlalo.
Umnyango uveze ukuthi uzophenya kabanzi ngale mibiko nangezimo eziholele ekutheni ihhovisi lomcwaningi-mabhuku ligcine lihoxise ukusebenza kwezisebenzi zalo kulo masipala.
“Ihhovisi lomcwaningi-mabhuku yilona eliphezulu, eliphenya liphinde licwaninge amabhuku kuzona zonke izinhlaka zikalulumeni, okuhlanganisa nomasipala, nabo okuphoqelekile ukuba balandele imiyalelo yalo.
Kasikwazi ukwamukela ukuthi kunezisebenzi zaleli hhovisi ezigcine zesatshiselwa ukuthi zenza umsebenzi wazo,” kusho isitatimende somnyango. Lo mnyango uthi uzibophezele ekubeni ube nezinhlelo ezilekelela omasipala abangenzi kahle ukuqinisekisa ukuthi imiphumela yokucwani- ngwa kwamabhuku abo iba mihle. Uveze ukuthi uzimisele ngokuba nobudlelwano obuhle nehhovisi lomcwaningi-mabhuku KwaZuluNatal.
Ngaphandle kokuphenya lolu daba, lo mnyango usonga ngokubhekana ngqo namakhansela nezisebenzi zomasipala abangenzi kahle. Lokhu uthi uzokwenza ngokuqinisekisa ukuthi kabakhushulelwa nhlobo imiholo.
“Umyalezo wethu komasilala abangenzi kahle ucace bha mabakhuphule amasokisi noma sizobhekana nabo ngqo,” kusho uNkk Dube-Ncube ngemuva kokuphuma kombiko wokusebenza komasipala abawu-54 baKwaZuluNatal.
Lo mnyango usuze wethula uhlelo olubizwa nge-Operation Bounce Back, ukulekelela omasipala abangenzi kahle. Bheka nasekhasini 13