ICHALAHA LIKASHAFUZA LIZOFIHLWA NGOMGQIBELO
UZOFIHLWA ngoMgqibelo KwaJikijiki, KwaMaphumulo, umculi kamasikandi, uSbongiseni Mjikijelwa “iChalaha likaShafuza‚” Ngubane ( osesithombeni), oshone ngoLwesihlanu ekuseni eThekwini emuva kokuxinwa wukugula isikhathi eside.
UNkz Thembi Ngubane, oyilungu lomndeni weChalaha, uthi kuhlelwe ukuba kwenziwe nezinkonzo zesikhumbuzo sakhe eGoli, yiKwaNjengabantu KwaMaphumulo naseThekwini ngoLwesine ntambama.
“Kasikaqinisekisi ngokwezindawo eziqondile okuzokwenzelwa kuzona izinkonzo zesikhumbuzo,” kusho uNkz Ngubane.
Induna yabalandeli beChalaha, uMnu Qhoshakufanele Mkhonza, ithi bazolivikela igama likaMjikijelwa, kabafuni liphele emlandweni womculo.
Uthi okubalulekile kubona wukuba bonke ebebethanda lo mculi babambane, baphinde baseke nezinsizwa eziphekwe nguyena kwezomculo.
“UMjikijelwa ubefana nobaba wethu, kakumele sidayise ngombuso wakhe. Sife olwembiza ngokuhamba kwale ndoda, sekumele samukele isimo njengoba sinjalo,” kusho uMnu Mkhonza.
UMjikijelwa uqale mhla ka-1 kuMbasa (April) emcimbini weNdidane Festival eMsinga, ubebonakala ukuthi kukhona okushaya amanzi ngoba umlenze ubewuhudula.
Kumqinisile ukugula phakathi noMbasa. Mhla ka-28 kuNdasa, ufike emcimbini wakwaMTN obuseCurries Fountain, eThekwini - okuyilapho ebonakale khona okokugcina phambi kwabantu - wathi uzijubile khona egula ngenxa yokuthi uyawuthanda umasikandi.
Kulo mcimbi ufike edondolozela ngenduku, kubonakala ukuthi isimo sakhe sibi.