Kundize amabhodlela befuna uBabes Wodumo
BAVUKE umbhejazane bajikijela amabhodlela esiteji befuna uBabes Wodumo abantu emcimbini obuseMlazi ngoMgqibelo ebusuku.
UBabes Wodumo ubengomuye wabaculi abebemenywe ukuzonandisa kulo mcimbi obizwa ngoMlazi Picnic kanti abaningi bebezobe bembona okokuqala enandisa ngemuva kwesigameko sohlelo lwengxoxo yakhe esiteshini somsakazo iMetro FM.
Ohlelweni lwantambama kulesi siteshi olushayelwa uMoflava noMasechaba Ndlovu olubizwa ngokuthi The Drive, uBabes umangaze abaningi kuvela izindaba zokuhlukana kwakhe noMampintsha nokuthi ubemhlukumeza embhaxabula.
NgoMgqibelo uBabes utheleke kulo mcimbi ehamba nabaqaphi, abadansi kanye nomdlali webhola likanobhutshuzwayo ongunozinti, uBrilliant Khuzwayo.
Kuwona futhi lo mcimbi bekukhona noMampintsha naye otheleke ehamba nelakhe iqeqebana nozakwabo kwiBig NUZ uDanger.
Abantu baqale ukukhombisa ulaka ngesikhathi kungena uJaiva Zimnike, baphakamisa izandla ezichaza ukuthi makaphume.
Lokhu kuqhubekile ngesikhathi lo mculi kamaskandi ecula. Ngemuva kwalo mculo kube sekugcwala izicukuthwane esiteji zajuxuza nokuthe ngemuva kwalokhu kwabe sekuqala uthuthuva abantu bakhombisa ukucasuka bamemeza igama likaBabes, babe sebeqala bejikijela amabhodlela esiteji.
UFelix Hlophe, ongumsakazi weGagasi, obengomunye wabaphathi bohlelo uzamile ukwehlisa imimoya ebisiphezulu. Abaqaphi bathwale kanzima bezama ukuvimba abantu njengoba bebephusha ucingo olubavimbe ukuba basondele esiteji njengoba lugcine luwile.
Ngemuva kwesikhashana uFelix ugcine elimemezile igama likaBabes wabe esengena lo mculi okhonjiswe ukuthakaselwa ngabaningi.
Nakuba uMampintsha ebesesondele ngesikhathi kubizwa igama likaBabes kodwa akazange anandise naye njengenjwayelo.
UBabes wenze adume ngakho nokuthe ngemuva kwalokho abaqaphi bakhe bamdonsa ngengalo baze bayomfaka emotweni.
Ngemuva kukaBabes kube sekungena uMampintsha nozakwabo uDanger noLvovo Derrango baqhulula izingoma zabo ngokwehlukana base beyivala ngeyeBig NUZ esihloko sithi “Umlilo”.
Bekugcwele kakhulu kulo mcimbi obuqala ukwenzeka kulo nyaka obuhlelwe uDJ Boonu.