IMIVILIYELO KUGUJWA UBU-AFRIKA ETHEKWINI
BAYIGUBHE ngemiviliyelo i-Africa Month emini ngoMgqibelo eThekwini. Izinkumbi zabantu bezihamba zishaya imigidi eyahlukene emigwaqeni yakuleli dolobha.
Bebehamba beshaya imidanso, amacilongo, izigubhu, amapayipi ezimoto nawezithuthuthu.
Lo mviliyelo usuke eMarine Parade, eNorth Beach, baze bayoyivala enkabeni yedolobha lapho kuqhubeke khona injabulo sekukhona abaculi abebenandisa, okubalwa kubona uTipcee, uDJ Tira, iDistruction Boyz, uRingo, uDJ Happy Gal nabanye.
IDistruction Boyz, eshisa izikhotha nengaconsi phansi kubalandeli bayo, idumaze abaningi, okubalwa kubo nabahleli bomcimbi, ngokudlala imizuzwana nje yase ithi iyaphuthuma.
UMondli Mzizi, ongusomahlaya, nguyena obephethe uhlelo, elokhu ewaqhululile nje kwaze kwayovalwa umcimbi. UTipcee ungene nezakhe kwezwakala, abantu baze bamcela impinda.
UDJ Happygal ubeqhulula amanoni adumile waze wadlala nomculo wokholo. Kulo mcimbi bekungenwa mahhala kwazise ubuxhaswe nguhulumeni. Awudonsanga isikhathi eside njengoba uvalwe lisanda kushona nje ilanga.
UZanele Mbokazi, obehlela lo mcimbi, uthembise lukhulu ngonyaka ozayo.
Ekhuluma nentatheli, uthe: “Njengoba siwuqale ngempumelelo nje lo mcimbi, ngonyaka ozayo aba- ntu mabalindele okukhulu,” kusho yena.
Lo mcimbi uvalwe ngegiya eliphezulu nguRingo Madlingozi odedele amanoni akhe akudala okubalwa kuwona uDoli, Ndiyagodola namanye.