LIYAQHUBEKA ELASEMABHIDA
KUDUME upotiyane, waphinqa amehlo ummangalelwa ecaleni lezibhelu zaseMoses Mabhida Stadium ngesikhathi iMantshi Thembinkosi Ngema imtshela ukuthi iyayihoxisa ibheyili yakhe.
UMnu Phelelani Jojisa (32), ongumangelelwa ka-10 ecaleni lokususa uthuthuva emphakathini, elokungena enkundleni ngaphandle kwemvume nelokuhluleka wukulandela umyalelo wamaphoyisa, ubevele eNkantolo yeMantshi yaseThekwini ngoLwesihlanu.
Ubesevele e-court 10 kanti phambilini ubevela e-court A, kuyona le nkantolo. Uqale ukukhululeka ngesikhathi imantshi isimchazela ukuthi njengoba ibheyili ihoxiswa, uzobuyiselwa imali yakhe bese eyikhokha kabusha kwazise icala lakhe seli- shintshelwe e-court 10 lapho ajoyine khona abanye abamangalelwa abawu-9 abasolwa ngamacala afanayo nawakhe. Ithe uma engayikhokhi kabusha le bheyili, uzolala esitokisini.
Asolwa nabo nguMnu Siphosenkosi Memela (32), nguMnu John Khumalo (29), nguMnu Khwezilomo Madiba (35), nguMnu Cebolendoda Hadebe (21), uMnu Douglas Mkhize (42), nguMnu Lungisani Jaca (33), nguNkz Nolwethu Cokatha (29), nguNkz Zibongile Njova (27) noMnu Sihle Zungu.
Laba bamangalelwa benze la macala mhla ka-21 kuMbasa (April) ngesikhathi bengena eMoses Mabhida Stadium emuva komdlalo we-semi final yeNedbank Cup phakathi kweKaizer Chiefs neFree State Stars.
IStars ibhaxabule iChiefs ngo2-0 kulo mdlalo ngamagoli amabili kaHarris Tchilimbou waseCongo Brazzaville.
Emuva komdlalo, abalandeli bavuke umbhejazane, bangena enkundleni balimaza impahla, bashaya nonogada.
UMnu Madiba kuvela ukuthi ungomunye wabantu abashaye balimaza unogada ngalolu suku.
Imantshi ithe: “Njengoba nisahamba leli cala, kanivumelekile ukwethamela imidlalo ezokuba KwaZulu-Natal ngoba imibandela yebheyili yenu isho njalo.
“Kakuvumelekile nokuba niyobukela ngisho izingane zenu esikoleni uma zinemidlalo kanti niyakhunjuzwa ukuthi uma nephula imiyalelo yebheyili, imali yenu eniyikhokhile izocwila bese nigqunywa ezitokisini kuze kuphethe ukuthethwa kwecala.”
Icala lihlelele umhla ka-26 kuNhlangulana (June). Abamangalelwa bonke bangaphandle ngebheyili ka-R1 000 umuntu ngamunye.