Ithembise ukukhuculula uMtubatuba imeya
Iphendula izikhalo zomphakathi kwisabelomali
IBISEQHULWINI indaba yokuhlushwa komphakathi ngamaphara nokungcola kwedolobha laseMtubatuba, ngesikhathi kwethulwa isabelomali sikaMasipala waseMtubatuba, KwaMsane Hall, ngoLwesine.
Umphakathi wakule ndawo othole ithuba lokubhodla okungaphakathi kuwona, utshele iMeya yaseMtubatuba, uMnu Velangenkosi Gumede ngezinkinga obhekene nazo.
Ukhale kakhulu ngendle ecinanisile edolobheni namaphara, wanxusa umasipala ukuba uzisukumele lezi nkinga. Elinye ilungu lomphakathi, uMnu Ntando Mthiyane (42), liveze ukuthi idolobha ngeke lizihehe izivakashi uma abantu behamba kulona bevika indle.
“Idolobha lethu libole phuhlu, kasikwazi ukuhamba edolobheni ngenxa yokunuka. Kangazi ukuthi ngumuntu onjani okwazi ukukhumula ibhulukwe edolobheni enze lokhu kungcola,” kusho uMnu Mthiyane.
Ngokuthola kweLANGA, ezinye zezimo ezidala ukuba abantu bazikhulule edolobheni, wukungabikhona kwendlu yangasese eseduzane. Abantu abaningi bayaphoqeleka ukuba basebenzise izindlu zangasese zakwamasipala ezithanda ukuba kujana.
UMnu Gumede uthembise umphakathi ukuthi bazozama ngayo yonke indlela ukuthi amaphara angacanasi edolobheni, okungenye yezimbangela zokungcola kwalo.
Uthe sebeqoke usuku lapho bezophuma khona umkhankaso wokukhuculula leli dolobha.
Uveze nokuthi sebebumbe ithimba elizobheka ezokuphepha emphakathini, elizokwaziwa ngeCommunity Safety Forum.
“UMtuba usidinga sonke, ngeke sikwazi ukubuka izelelesi zizenzela. Sizozama ngayo yonke indlela ukugcina umphakathi wethu uphephile, sizokwakha izindlu zangasese ezanele edolobheni,” kusho uMnu Gumede.
Isabelomali sika-2018-2019 salo masipala sibe wu-R249 000 000.
Le mali kuthiwe izosiza ukwakha izindlu zangasese, imigwaqo, wukufukula amabhizinisi nokunye okudingwa umphakathi.