BAFUNDE OKUNINGI KOWETHEKU
UFUNDE okuningi umphakathi embukisweni wamabhizinisi amancane obuhlelwe wuMasipala weTheku eHammarsdale Junction Mall, oqale ngoLwesihlanu waze waphela izolo ngeSonto.
Lo mbukiso uvulwe ngokusemthethweni nguMnu Sipho Kaunda, ongusihlalo we-Economic & Development and Planning kuMasipala weTheku.
Uthe lo mbukiso kuhloswe ngawo ukuthuthukisa isizwe, ikakhulukazi intsha. Bekuphithizela ngosuku lokuqala umphakathi uyobona amakhono anhlobonhlobo, kuthengwa, kufundwa njalonjalo.
Ingqephu ibidla umunyu, abakagesi bekhombisa ngezindlela zokuwonga, i-Elangeni TVET College ibikhangisa ngemikhiqizo yezolimo. Abanye abebekhona yilaba:
Medizone Healthcare abagxile ekwelashweni kwabantu ngamakhambi emvelo.
Umnyango obhekele ubuqotho nokuphenya kumasipala olwa nokukhwabanisa nenkohlakalo, obufundisa ukuthi usebenza kanjani futhi zingabikwa kuphi ezithinta inkohlakalo nokukhwabanisa.
AbakwaTruth Health and Beauty Salon, abenza umsebenzi wokuba umzimba ubukeke kahle, wubhucabhuca umzimba, wukucwala izinzipho nokunye.
Bekukhona nezinkakha ezinamakhono avelele okwakha izi- ndlu iMpungushe Construction kaMusa Ngubane waseCato Ridge.
AbakwaDolsden Oracle abasebenza ukuqeqesha osomabhizinisi abancane ngazo zonke izindlela zokungena emabhizinisi nokuthola uxhaso lwemali.
IFundy Promo Girls Promotion eholwa nguNkz Fundiswa Radebe elekelela noma ngubani osuke efuna ukukhangiselwa ibhizinisi lakhe.
Kulo mbukiso, abeThekwini Business Indaba batshele izakhamizi zaseMpumalanga (eHammarsdale) ukuthi kuseza intuthuko yokwakhiwa kwamabhuloho, amafemu neyokulungiswa kwemigwaqo okuzovula amathuba emisebenzi.