Izothwala kanzima imboni yezezimoto
Uhulumeni kaTrump ufuna ukufaka intela
INGASE igqemeke engeqiwa ntwala imboni yezimoto eNingizimu Afrika emuva kwesimemezelo sikaMengameli wase-United State of America (USA), uMnu Donald Trump, ngeledlule sokuthi umnyango wezomnotho kuleliya lizwe wenza uphenyo mayelana nezimoto ezivela kwamanye amazwe, kanti umbuso wakhe umunyunga indaba yokugaxa intela ka-25% kulezi zimoto.
Ngonyaka odlule imakethe yase-USA yamukele izimoto ezilinganiselwa ku37 000 zisuka eNingizimu Afrika - iyizwe lesibili ukwamukela izimoto ezikhiqizwe kuleli, ilandela i-United Kingdom (UK) yona eyamukele eziwu-54 400. Ngo2016 leli lithumele izimoto zemali elinganiselwa ku-R23.5 million e-USA.
Isizinda sakwaFord, esakwaBMW nesakwaVW ezizinze kuleli, yizona ezithumela imikhiqizo yazo e-USA.
Okwamanje, ngenxa ye-African Growth and Opportunity Act (AGOA) - eqale ukusebenza ngoNhlaba (May) ka-2000 kusabusa uMnu Bill Clinton e-USA - abakhiqizi bezimoto baseNingizimu Afrika kabayikhokhi intela uma bezithumela ezimakethe zakuleliya lizwe, okubenze badla kahle kule minyaka edlule.
Empeleni i-AGOA le ivuselelwe nguMnu Barack Obama ngesikhathi engumengameli wase-USA, izoze iphelelwe yisikhathi ngo-2025.
Nokho uMnu Trump usanda kuyishaya indiva njengoba uhulumeni wakhe wenqabile ukunika iNingimu Afrika ushwele enteleni yensimbi ne-aluminium ethunyelwa yizinkampani zakuleli ezimakethe zase-USA.
Uyibhanqe neChina, yiRussia neIndia ukubala amazwe ambalwa.
Abaphunyukile kule ntela ngamazwe angaphansi kwe-European Union, yiMexico, yiSouth Korea, yi-Australia, yi-Argentina, iBrazil neCanada.
Phambilini izinkampani zakuleli zensimbi ne-aluminuim, bezingayikhokhi le ntela ngenxa ye-AGOA osekunovalo lokuthi ngeke ivuselelwe ngo-2025 uma kubhekwa indlela uMnu Trump enza ngayo.
Isimemezelo sentela yezimoto sihlatshwe kakhulu ngamazwe ahwebelana ne-USA. Ongoti bezohwebo bathi kungenzeka ukuthi uMnu Trump wenza lokhu nje, ududula i-USA uyibhekise empini yezohwebo. Cishe wonke amazwe awu-10 angase ashayeke kakhulu ngesenzo sikaMnu Trump anobudlelwano bezohwebo obujulile ne-USA.
Amazwe amabili ahamba phambili ngezimoto ezithunyelwa e-USA, angamalungu eNorth American Free Trade Agreement (NAFTA), okuyiMexico Canada.
ICanada ithumela izimoto eziningi ezithwala abantu e-USA - njengoba nyakenye ithumele ezentengo elinganiselwa ku-R565.2 billion kanti iMexico ithumela kakhulu ezithwala impahla - ngo-2017 ithumele ezilinganiselwa ku-R66.9 billion.
Abahlaziyi bezohwebo bathi kungenzeka ukuthi ukumenyezelwa kwale ntela yezimoto yiqhinga likaMnu Trump lokumpintshela ekhoneni iCanada neMexico ezingxoxweni phakathi kweUSA neNafta.
“Ngicabanga ukuthi izisebenzi zenu ezisembonini yezimoto nezinkampani zenu ezikuleli lizwe, zizojabula ngokuzokwenzeka. Nizobona maduze nje uku- thi yini le engikhuluma ngayo,” kusho uMnu Trump.
“I-Nafta inamakhanda aqinile, iMexico neCanada kuthanda ukuba nzima ukubonisana nabo,” kusho uMnu Trump. Amanye amazwe alandela iMexico neCanada ngemikhiqizo yezimoto ethunyelwa e-USA yiJapan, iGermany neSouth Korea.
Izikhulu zawo womathathu la mazwe zizwakalise ukukhathazeka ngale ntela efufusayo.
Uhulumeni kaMnu Trump udinga isikhathi esingangesonto ukuphenya indaba yezimoto ezingena kuleliya lizwe ngaphambi kokuba uthathe isinqumo.