BAYAZIBULALA BAYAZIQEDA EZEMFUNDO
MHLELI: Ngizwakalisa ukukhathazeka kwami ngesihlava esihlasele imfundo yezikole zethu KwaZulu-Natal, ikakhulukazi kuMasipala iKing Cetshwayo. Ungathi baphume umkhankaso wokuthi kuqambe kushaya u-2020 zibe sezife nya.
Uma uthishanhloko ehluleka wukuthola okungenani u-50% kumatikuletsheni iminyaka ewu-7 kuya kwewu-10, uyozwa kuthiwa usekhushulelwe esikhundleni sokuba ngumhloli we- ward noma wesekethe.
Uma ungase wenze uphenyo, bonke abahloli - ikakhulukazi eMhlathuze naseMfolozi - bambalwa abakhushulelwa ezikhundleni ngenxa yamagalelo abo, iningi linikwa lezi zikhundla ngoba liyizikhothangqondo zomqondisi wezemfundo (eKing Cetshwayo) ,okungethusi ngoba naye wagixabezwa ngalesi sikhundla esuka kuPL1 enePTD.
Uma kunezikhala zothishanhloko iSouth African Democratic Teachers' Union (Sadtu), izibambela mathupha uzwe inikana zonke izikole.
Ungathi-ke manje basemkhankasweni wokubhuqa nya lezi zikole ezinkulu ebezaziwa njengezama-model C, balwa nazo shaqa.
Umuntu ahlulwe wukuphatha isikole esinezingane eziwu-300, usenikwa esineziwu-1 500 bese kuthiwa kwenziwa uguquko ( transformation). Cha, zaze zabulawa izikole ngenxa yobugovu nomhobholo wokuphatha.
Sengidabukela abasazofundisa izingane zabo ngoba kuyacaca ukuthi izikole ezizimele zizothi chithi saka abantu beyofundisa izingane zabo kuzona ngoba kayikho le nto eyenziwa yiSadtu, isemkhankasweni wokuzibhuqa nya izikole.
Le nto eyenzeka kwipolitiki iyeza nasezikoleni ngoba zizophela izikhala, baqale babulalane bodwa.
Sithule siyabuka, ngiyosho ukuthi ngasho.
Kawusakwazi ngisho ukubongela umuntu uma ekhushulelwe kwesinye isikhundla ngoba usuke esithole ngendlela emnyama, kungaba wukugwaza noma ububhululu.
Kulungile, dlanini bomudliwamafa, kasinamona sesikhalela isizukulwane esizayo.