Usemningi umsebenzi ohlalele uMengameli Ramaphosa
NGELEDLULE uMengameli Cyril Ramaphosa uqede izinsuku eziwu-100 ethathe izintambo zo- mbuso.
Ngokwemibono yeningi labahlaziyi bezombusazwe nabantu baseNingizimu Afrika jikelele, kubukeka becabanga ukuthi usenze umsebenzi omuhle kokuningi noma zisekhona izinkinga okufanele azilungise ngokushesha.
Okukhulu kunakho konke asekwenzile uMnu Ramaphosa, wukunika ithemba ezakhamizini lokuthi zijikile izinto. Sekunethemba lokuthi inkohlakalo, ukwebiwa kwemali yabakhokhi bentela isidana nokuhluleka ukuphatha uhulumeni ngendlela kuzolwiwa nakho, kulungiswe isimo.
Empeleni umsebenzi kaMnu Ramaphosa wokwenza ngcono isimo ezweni ulula kakhulu ngoba umuntu athathe kuyena isikhundla, uMnu Jacob Zuma, ushiye umonakalo owesabekayo emazingeni kahulumeni.
Cishe yonke iminyango kahulumeni, ohulumeni bezifundazwe abaphethwe yiqembu elibusayo i-African National Congress (ANC), omasipala, izinkampani zombuso kugutshuzelwe yinkohlakalo, ukwebiwa kwemali yabakhokhi bentela nokuba sezikhundleni zokuphatha kwabantu abangawazi umsebenzi, ababekwa ngetiye.
Ngokwenza nje imizamo yokulungisa lo monakalo owenzeke kule minyaka elishumi eyedlule, uMnu Ramaphosa usezitholele amaphoyinti ngokunika ithemba lokuthi ukhiphe izwe emlonyeni wengwenya.
Umsebenzi omhlalele uMnu Ramaphosa wukuqinisekisa ukuthi izinkulumo zakhe zilandelwa yizinyathelo ezibonakalayo ukulwa nenkohlakalo ebisimile izimpande ezinde.
Kunabantu eqenjini lakhe abebengongqongqoshe, abanye beyizikhulu eziphezulu eminyangweni nasezinkampanini zikahulumeni, abathintekayo ekwebeni imali yombuso.
Laba bantu kufanele baboshwe, bashushiswe kwenziwe ngabo isibonelo ukuze nabanye abacabanga ukuzinothisa ngemali yentela, bezothola isifundo.
Kusekhona ongqongqoshe kwiKhabhinethi likaMnu Ramaphosa abasolwa ngokuba yingxenye yabebezitika ngemali yombuso, nabo kufanele bakhonjwe indlela.
Kunenkolelo eningini labantu yokuthi umengameli wezwe nohulumeni kufanele baxazulule zonke izinkinga abantu ababhekene nazo, kuhlanganisa ukudala amathuba emisebenzi nokubakhela izindlu imbala.
Le nkolelo yakhuthazwa yilona iqembu elibusayo uqobo, ngokwenza izethembiso elingeke lakwazi ukuzifeza nanini ngoba lifuna ukuzuza amavoti ngezikhathi zokhetho. Iqiniso wukuthi umsebenzi kahulumeni wokuqala obalulekile wukuqinisekisa ukuphepha kwezakhamizi, okunye-ke kuza ngemuva.
Omunye umsebenzi kahulumeni obalulekile wukusingatha imali yabakhokhi bentela ngobunono bekati, ushaye nemithetho engenza ukuba osomabhizinisi bakwazi ukuqala izimboni, baqashe abantu, kudaleke amathuba emisebenzi. Ukuze kube nalesi simo sozinzo, kufanele labo abasemandleni emazingeni kahulumeni - kusukela komasipala kuze kufike kumengameli wezwe imbala - kube ngabantu abaqotho, abathenjwayo ukuthi ngaso sonke isikhathi bazokwenza okuzothuthukisa izwe nabantu abalakhele, hhayi ukuzicebisa bona nabangani babo.
Umsebenzi omkhulu kumuntu ongumengameli wanoma yiliphi izwe wukuba wuphawu lobumbano, anike ithemba kubantu, abenze bahlalele ethembeni lokuthi noma kunzima namhlanje, izinto zizolunga kusasa.
Ngaphansi kukaMnu Zuma amathemba abantu abaningi abeseshabalele. Noma kusesekuseni ngohulumeni kaMnu Ramaphosa, asekwenzile kulezi zinyanga ezintathu ezedlule kunika izwe ithemba lokuthi ikusasa lingase libe ngcono kunomnyama izwe ebelikade lidukuza kuwona, cishe iminyaka elishumi eyedlule.
Sekuqopheke umlando edolobheni laseThekwini ngokuba abacwaningi bamabhuku abaqhamuka ehhovisi lomcwaningi-mabhuku, bahoxiswe ekwenzeni umsebenzi wabo ngenxa yezinsongo zokwesatshiswa ngabathile kuleli dolobha.
Kucacela ngisho ingane encane ukuthi isizathu sokwesabisa abacwaningi-mabhuku yingoba abenzi balokhu besaba ukuthi kuzovela inkohlakalo nokwebiwa kwemali kulo masipala.
Uma kungenjalo, ngabe lokhu bakwenzelani?
Imeya yedolobha, uNkk Zandile Gumede, isithembise ukuthi bazobambisana nehhovisi lomcwaningi-mabhuku, kuvikelwe nabacwaningi ukuze baqhubeke benze umsebenzi wabo.
Empeleni vele kakukho okunye abengakusho uNkk Gumede ngoba okwenzekile yihlazo eseliphendule leli dolobha, ebelihlonishwa ngokuphathwa ngendlela eyiyona nokusingatha kahle imali yabakhokhi bentela, ihlaya ezweni.
Kukhona okushaya amanzi kulo masipala, yingakho kufanele umnyango owengamele ezomasipala kuzwelonke ngaphansi kukaDkt Zweli Mkhize, ungenelele, kwenziwe uphenyo olunzulu ngokuphathwa kwawo nokwabiwa kwamathenda.
Lolu phenyo kufanele luqale emuva, cishe eminyakeni embalwa edlule yikhona kuzolandeleka kahle umnyombo wempethu yenkohlakalo esolwayo kulo masipala. Kungaba yisu elihle ukuba uphenyo lusingathwe ngabacwaningi-mabhuku abaqhamuka kwezinye izifundazwe, abazovikeleka ekwesatshisweni ngokugilwa isilo sengubo.
Kubalulekile ukuba ziphenywe kabanzi lezi zinsolo zenkohlakalo ukuze kutholakale ukuthi ziliqiniso yini noma ngamapunge. Uma lokho kungenzeki, kungadala ukuba abahlali, okuyibona abakhokha ama- rate akhokhela imisebenzi yemiphakathi, bawagodle, ligcine liwe bhu idolobha.
Empeleni umsebenzi kaMnu Ramaphosa wokwenza ngcono isimo ezweni ulula kakhulu ngoba umuntu athathe kuyena izintambo ushiye umonakalo...