KUBANJWE UBUSHOMPESHOMPE OKHETHWENI LWESAFA
KUBUKEKA isekude ukuphela impi ephakathi kobuholi beSouth African Football Association (Safa) no-Andile “Ace” Ncobo odube ukhetho lwale nhlangano obelungoMgqibelo eSandton, eGoli, ekhala ngokwesatshiswa ngabathile.
Lolu khetho lugcine lunqotshwe nguDanny Jordaan obengasaphikiswa muntu esikhundleni sokwengamela le nhlangano ephethe unobhutshuzwayo wakuleli.
ILANGA lithole ukuthi iSafa ihlela ukubeka uNcobo, amacala ngokusemthethweni lingakapheli leli sonto ngalokho ekubiza ngokuhudulela phansi igama layo.
Kuthiwa sekubambe ukuba bathole ijaji elingakwazi ukuhlalela udaba lwakhe ngokushesha.
Izindaba zezinhlelo zokushushisa uNcobo ziqinisekiswe nguDominic Chimhavi wezokuxhumana kwiSafa, osole nabezindaba ngokulandelana noNcobo.
NoJordaan ekhuluma nabezindaba ngoMgqibelo emuva kokhetho, ugxeke ukunakwa kukaNcobo amsole ngokukhuluma imfishimfishi. Uthe ujatshuliswa wukuthi ukhetho lubusiswe yiFifa, Caf neCosafa abebemelwe.
Imizamo yokuthola uNcobo iphunzile kwazise ucingo lwakhe belukhala kodwa lungabanjwa kwaze kwashaya isikhathi sokuloba.
Okhethweni lweSafa kugcine kufeyilile ukuqokwa kwabazomela izifundazwe njengoba kubanjwe ubushompeshompe obebukhahlelela ngaphandle uThemba Phiri wasoThukela noMalusi Kubheka waseMajuba ekubangeni ukungena ebuholini beKwaZulu-Natal.
Ukhetho lwesifundazwe seluzokuba ngempelasonto esiya kuyona eThekwini. Bazokube bebanga noKwenzakwakhe Ngwenya waseMkhanyakude noThabile Msomi waseLembeni.
Amasekela kaJordaan azoqokwa emasontweni ambalwa ezayo emhlanganweni wesigungu esiphezulu esiqokwe ngoMgqibelo esakhiwe nguRia Ledwaba, uXolile Nkompela, uNatasha Tschilas, u-Emma Hendricks, uMxolisi Sibam, uPoobalan Govindasamy, uGladwin White, uGary Mokoena, uSimphiwe Xaba, uMzwandile Maforvane, uLeornard Shibe, uPaseka Nkone noBennet Bailey.