SEBELAMUKELE IZEMBE KWI-PSL
IPLATINUM Stars izobamba umhlangano namuhla ngoMsombuluko ngenhloso yokuqala amalungiselelo okuyodlala kwiNational First Division (NFD) yize isenalo ithuba lokuqhubeka nokudlala kwi-Absa Premiership.
IPlatinum ishayane yaze yabukana neBlack Leopards kuba ngu2-2 kowama- play off ngoMgqibelo ebusuku eMoruleng Stadium, eRustenburg.
IPlatinum bekufanele iwunqobe lo mdlalo uma ifuna ukuzibona inethuba lokuqhubeka nokudlala kwi-Absa Premiership.
Kufanele iPlatinum imincele ukuthi iJomo Cosmos ihlule iLeopards ngoLwesithathu ngo-15h00 eThohoyandou Stadium, bese yona izihlulela iCosmos emdlalweni wokugcina ozokuba ngoMgqibelo ntambama eGauteng.
ILANGA lithole ukuthi uRoger De Sa ongumqeqeshi ophinde abe ngumnikazi wePlatinum, ubize umhlangano ophuthumayo ozokuba namuhla ngoMsombuluko ntambama eRustenburg.
Kuthiwa kulo mhlangano uzoxoxa ngokufuduka kwale kilabhu njengoba isihamba eRustenburg, nokuthi kuncishiswe imiholo yabadlali abazimisele ngokuya nale kilabhu kwiNFD.
Kuthiwa uzophinde axoxe nomsizi wakhe, uMilton Dlamini ngokumehlisela umholo kwazise ufuna ukuqhubeka nokusebenza naye. Nokho abazazi zonke bathi uDlamini angase avumbuke kwiMbombela United okuthiwa imfuna uthuli.
Leli phephandaba libuza uDe Sa ngalolu daba, uthe:
“Izibalo ziyavuma kodwa amathuba mancane kakhulu yingakho kufanele siqale sibe senza amalungiselelo okuyodlala kwiNFD.”
ILeopards iqhwakele ngamaphuzu angu-5 emidlalweni emithathu, iCosmos iyisibili ngamabili emidlalweni emibili kuthi iPlatinum ibambe ibhuleki kwi-log ngamaphuzu amabili emidlalweni emithathu.