Ufihlelwe ngendaba yomndeni uMthembu
Ushushumbiswe isinyenyela ngabaqeqeshi
USHUSHUMBISWE isinyenyela umndeni kaBongumusa Mthembu, ozifake emlandweni enqoba okwesibili kulandelana iComrades Marathon izolo ngeSonto, esukele eMgungundlovu yasongwa eThekwini.
UMthembu ulandele uBruce Fordyce wakuleli onqobe lo mjaho kulandelana kusuka ngo-1981 kuya ku-1988.
Kubasubathi abamnyama, uMthembu ungowesibili ukunqoba lo mjaho iminyaka ilandelana emuva kokuba uStephen Muzhingi waseZimbabwe edle ubhedu kusuka ngo-2009 kuya ku-2011.
UMthembu nguyena odle ubhedu ngonyaka odlule lo mjaho ubheke eMgungundlovu, kanti izolo ubesewunqoba ihlandla lesithathu kwazise nango-2014 nguyena owadla ubhedu.
Uwunqobe evule igebe lemizuzu ewu-10 kuJoseph Mphuthi ongene endaweni yesibili.
UXolani Mabhida, ongumqeqeshi kaMthembu, utshele ILANGA ukuthi banqume ukungamazisi uMthembu ukuthi umndeni wakhe uzoyomhalalisela kulo mjaho.
Uthi lokhu bakwenze ngokuhlanganyela noMseni Ntombela, ongomunye wabaseka lo msubathi. Uthi babone kungcono bamfihlele uMthembu ngokutheleka komndeni wakhe ukugwema ukumfakela ingcindezi.
“Sekuphele izinyanga ezintathu uMthembu awugcina umndeni wakhe. Bekungeke kube lula ukumtshela ukuthi uzomamukela enkundleni ngoba ubezocabanga izinto eziningi, bese ephazamiseka ezinhlelweni zokunqoba lo mjaho. Simbonile ukuthi kumthinte kakhulu ukubona amalungu omndeni wakhe.
“UMthembu usebenzise ubuchule obusezingeni eliphezulu ukuze anqobe lo mjaho. Abaqeqeshi abaningi bebephumele obala bathi ngeke asivikele lesi sicoco.
“Nokho-ke sisebenze kanzima ngoba ngiyamazi ukuthi unamandla futhi uyazimisela,” kusho uMabhida ogile izimanga kulo mjaho njengoba ebenabasubathi ababili abaqede nabawu-10 bokuqala. Omunye wabo nguNkosinathi Duma, ongene endaweni yeshumi.
Ngonyaka odlule uDuma ubegijimela ukusiza uMthembu, kodwa waqeda endaweni ka-16, okwenze uMabhida wanquma ukuthi awungenele ngokugcwele lo mjaho nonyaka.
UDuma uqale ngokubongela uMthembu ngokudla ubhedu kulo mjaho. Uthe ujabule ngokwenza isikhathi esingcono kunesangonyaka odlule.
Bheka ekhasini 26 no-27