Ixabene imindeni ngendodakazi "ezithwele"
Bathe sebeyihlawule ngembuzi nangenkomo, bathola ukuthi kayikaze ikhulelwe
IBHEKENE ngeziqu zamehlo imindeni emibili yaKwaSthebe, eMandeni ngenxa yenhlawulo enikwe omunye kuhlawulwa intombazane yakhona obekuthiwa ikhulelwe kanti kakunjalo.
Umndeni womfana ufuna kubuyiswe imali yenhlawulo. Lolu daba okuthiwa selwehlule ngisho izinduna, selwedluliselwe enkantolo yeNkosi ukuba kube yiyona ethatha isinqumo.
Ngokuthola kweLANGA, uNkz Nozipho Mpanza (23), utshele uMnu Sipho Mthembu (23) obeyisoka lakhe ukuthi ukhulelwe.
Kuthiwa uMnu Mthembu ubikele umndeni wakhe ngomonakalo asewenzile. Kuthiwa unina uNkz Busi Mthembu, wakujabulela lokho walungisa imali yokuyohlawula kwaMpanza. Umthombo uthe unina womfana ubejabulile njengoba zonke izindleko zokuba uNkz Mpanza aye kodokotela bezikhokhelwa nguyena, amnike nemali yokuya emtholampilo.
Umndeni kaMnu Mthembu kuthiwa uhlawule ngembuzi nenkomo. ILANGA lithole ukuthi indaba iqale sekushaya izinyanga eziwu-9 uNkz Mpanza engabelethi, zadlula zaze zaba wu-11 iqhuba isisu. Kuthiwa uNkz Mthembu uhambe noNkz Mpanza baya kudokotela beyothola ukuthi sekubambephi manje.
Umthombo utshele ILANGA ukuthi babuye kudokotela bejabhile njengoba ebatshele ukuthi uNkz Mpanza akakhulelwe futhi akanazo nezimpawu zokuthi uke wakhulelwa. UNkz Mthembu kuthiwa uthukuthele wagana unwabu, wakhala ngemali yakhe aseyichithile ehambisa uNkz Mpanza kodokotela.
Ufuna ukuba abuyiselwe imali njengoba ebesekhokhe inhlawulo. Umthombo uthi udaba lugcine selungenelelwa yizinduna ezimbili ngenxa yokuthi le mindeni ibingasezwani. OwakwaMthembu usola uNkz Mpanza ngokuba yisigebengu. Kuthiwa induna, uMnu Siboniso Madida, iyalele umndeni wakwaMpanza ukuba ubuyisele inhlawulo yakwaMthembu.
Indaba yonakale uNkz Mthembu esethi ufuna ukubuyiselwa imali, hhayi inkomo nembuzi lokhu akukhiphile. ILANGA lihambele le mindeni, owakwaMthembu wale waphetha ukukhuluma ngalolu daba, ukhala ngokuthi seluwuhlukumezile futhi usuyidubile ngisho nenhlawulo, osola ukuthi umndeni wakwaMpanza ugweve nayo.
UMnu Madida uthe uyalwazi lolu daba, beluphethwe nguyena kodwa ugcine eludlulisela enkantolo yenkosi. Uphelezele leli phephandaba waliyisa kwaMpanza. UMnu Khohlwangifile Mpanza, onguyise kaNkz Mpanza, uthi lolu daba selumakhele izitha. Uthi nabo bewumndeni bebazi ukuthi indodakazi yabo ikhulelwe, bathuke sebetshelwa ngudokotela ukuthi kakunjalo.
Utshele ILANGA ukuthi ubengeke ayithathe inhlawulo ukuba ubazi ukuthi indodakazi yakhe kayikhulelwe futhi ubenge- nayo inkinga yokuyibuyisela (inhlawulo) kwaMthembu. “Yimina ofonele unina womfana, ngifuna ukuhlela ukuthi ngiyibuyisela kanjani inhlawulo yakhe. Ngethuke ngoma uma esebhoka ngolaka engitshela ukuthi sizohlangana enduneni.
"Kangimhluphanga, sihlangane enduneni udaba lwakhulunywa ngavuma ukuthi ngizoyibuyisela inhlawulo ayikhiphile, okuyimbuzi nenkomo,” kusho uMnu Mpanza. Uthi nebala kakudlulanga isikhathi esingakanani wayiqhuba imbuzi nenkomo wakuyisa enduneni ukuba kulandwe ngabakwaMthembu njengoba babecelile.
Uthi uze waphindela nazo emuva izilwane abakwaMthembu bengafiki ngoba bethi sebefuna ukubuyiselwa imali, bethi kabanaso isibaya sokugcina lezi zilwane. “Mina ngiwenzile umsebenzi wami, yibona abangazange bazilande ngakho mabakhohlwe, lingawa licoshwe yizinkukhu, ngeke ngiyikhiphe imali,” kusho uMnu Mpanza.
Uthi induna ize yanquma ukulidlulisa icala ngoba nayo ibona ukuthi lingaphezu kwayo. Induna ithi udaba selungene kaningi enkantolo yenkosi kodwa uNkz Mthembu engafiki.