Kugqame uqhekeko kweye-ANC
Kuthiwa kusekhona abakholelwa kuZuma
UBABAZA uqhekeko oluhlale obala njengezinqe zesele kwi-African National Congress (ANC) engqungqutheleni yaleli qembu KwaZulu-Natal, ebiseBhekuzulu Hall, KwaDlangezwa, eMpangeni, umhlaziyi wezepolitiki, emuva kokuba lo mhlangano ubhuntshile.
I-ANC KwaZulu-Natal bekufanele ikhethe ubuholi kule ngqungquthela ebihlelelwe ukuqala ngoLwesihlanu kuya izolo ngeSonto nokho yagcina ifane nocabhayiyane, umdlalo wezingane emvuleni.
UMnu Zakhele Ndlovu, ongumhlaziyi wezepolitiki, uthi ukuculwa kwamaculo anezinhlamvu ezithi “Wenzeni uZuma” kule ngqungquthela, kukhombise ngokusobala ukuthi i-ANC ihlukene phakathi futhi kuzoba nzima ukuzama ukulungisa lo monakalo.
Uthi ubungafunga ukuthi yingqungquthela yamaqembu amabili. Ukusho lokhu emuva kwesigameko sangoLwesihlanu lapho inkantolo ikhiphe umyalelo wokuba imiswe le ngqungquthela. Ziningi izigameko ezenzeke ngoLwesihlanu okubalwa kuzo ukuphazanyiswa kukaMnu Gwede Mantashe ongusihlalo we-ANC ngesikhathi ezama ukwethula inkulumo yosuku.
Kuze kwadingeka ukuba kungenelele uMnu Sihle Zikalala kodwa nakho lokhu kugcine kungasizanga njengoba egcine engakhulumanga uMnu Mantashe. UMnu Ndlovu uthi lokhu kukhombise ukungaziphathi kahle nokungahleleki kwamanye amalungu e-ANC.
“Bengikhona kule ngqungquthela ngoLwesihlanu. Indlela amalungu enze ngayo ngesikhathi kukhuluma usihlalo waleli qembu ikhombise ngokusobala ukuthi akukho ukuhloniphana kwi-ANC.
“Ngokubona kwami kuzothatha isikhathi ukulungisa lolu qhekeko yize kuzomele igcine ihlalile le ngqungquthela,” kusho uMnu Ndlovu
Ngaphandle kwalokho uthi nalabo abebekhombisa ukweseka obengumengameli waseNingizimu Afrika, uMnu Jacob Zuma, ngoLwesihlanu - emuva kokuvela kwakhe enkantolo - kusaveza khona ukuthi kunabantu abasakholelwa kuyena. Uthi lokhu kwakha isithombe sokuthi kunabantu abacabangela izisu zabo kuneqembu nokungabuhloniphi ubuholi baleli qembu.
UMnu Ricardo Mthembu, ongusihlalo wesiyingi iKwaDukuza, uthi banengekile ngesenzo sabantu abafake leli qembu enkantolo ngoba bakhombisa ukungazihloniphi izinqumo ezithathwa wubuholi be-ANC. Uthi kuzomele iqembu libathathele izinyathelo ngesenzo sabo yize besihlonipha isinqumo senkantolo.
Imizamo yokuthola okhulumela leli qembu, uMnu Pule Mabe, kayiphumelelanga njengoba ucingo lwakhe belukhala lungaphendulwa.
Bheka ikhasi 15