UBoneni uzovela kwiRythm City
Uzibona eyindlovukazi kamasikandi ngempela
UZIBONA eseyindlovukazi kamasikandi ngempela uBoneni Magubane waKwaHlazakazi, eNquthu, njengoba engowesifazane wokuqala (kulolu hlobo lomculo) ozobonakala kumabonakude elingisa emdlalweni owuchungechunge, iRhythm City ekupheleni kukaNtulikazi (July).
Lo mdlalo udlala ngo-19h00 kusukela ngoMsombuluko kuya kuLwesihlanu ku-e.tv.
UBoneni uthi ekukhuleni kwakhe ubenekhono lokubhala imidlalo yeshashalazi esikoleni aphinde alingise, kodwa ubengakaze azitshele ukuthi ngelinye ilanga uyolingisa ezingeni eliphezulu ngoba lokho bekungelona iphupho lakhe.
“Esikoleni ngangidlala imidlalo yeshashalazi ngenhloso yokuthi kubekhona engikwenzayo kwazise abafundi babenza okuningi. Sekucacile ukuthi uNkulunkulu wayengibekele okukhulu,” kusho uBoneni.
Uthi emasontweni amabili edlule bekunomdlalo weshashalazi eJoburg Theatre, iVoice of Masikandi, kanti kunezimenywa zeRhythm City ezichazekile ngendlela ashaya ngayo ingoma.
Zixhumane nabahleli balo mdlalo (weshashalazi) zimfuna. Le ntokazi ibizwe ngoba kunengxenye okumele iyidlale lapho khona kugcinwa izinto zesintu.
“Kumasikandi besimelwe nguMfiliseni Magubane obelingisa kodwa nami-ke ngingowoku- qala wesifazane ozobonakala edlala izigatshana ezithile kumabonakude. Lokhu ngikubona kuyisithombe esihle emculweni wethu, kukhombisa ukukhula kakhulu,” kusho uBoneni.
Nakuba uBoneni egqame kakhulu ngomculo kamasikandi kodwa ikhono lakhe elehlukile livelile eminyakeni emibili edlule, kuMantshontsho Awards eThekwini, lapho eshiye izihlwele zibambe ongezansi ngesikhathi ecula izingoma zikaBusi Mhlongo (ongasekho) nezikaThandiswa Mazwai, ngokubambisana noBonakele naye ongumculi kamasikandi.