BEKUGCWELE E-WORKSHOP BEZOBONA UDSD
UPHUME umkhankaso wokuzihambisela mathupha umculo wakhe kubalandeli bakhe uKhangelani “DSD” Mhlongo njengoba kuvalwe kwasani eWorkshop, eThekwini ngeSonto kubuthelene abalandeli bakhe bezobungaza.
UKhangelani uveze ukuthi kubalulekile ukuzifikela mathupha kubalandeli ngoba kwenza kudayiseke kalula uma abantu bekubona ngamehlo. Utshele ILANGA ukuthi njengoba esevule inkampani yakhe, iNjomane Entertainemnt, lokhu kuyisiqalo sokuba aye phambili kakhulu nempumelelo emculweni.“Sengizibambela mathupha umsebenzi ngaphansi kwegama likaKhangelani, kodwa iqembu oSaziwayo lisazoqhubeka ngaphansi kwenkampani yeZingane Zoma Music Production,” kusho uDSD.
Ufike eThekwini eselindelwe ngabomvu njengoba bekuphume amagatsha abalandeli bakhe ezozithengela mathupha le-albhamu ethi “The Clairvoyant,” ephume ngoLwesihlanu. NgoMgqibelo bekuhlanganelwe kwaMai-Mai, eGoli nakhona wenze esifanayo.
Utshele leli phephandaba ukuthi ukuziyela kubalandeli kunomthelela omuhle ngoba ukwazile ukuthola imali enkulu kakhulu kubalandeli baseGoli.
“Ngizoya kuzona zonke izindawo engaziyo ukuthi ziyisizinda sabalandeli bami nakoMpangeni imbala,” kusho uDSD.
Kungokokuqala ukuba akhiphe i-albhamu ngaphansi kwegama lakhe kanti lensizwa inomlando ekusebenzeni noMgqumeni “iBhova” Mseleku (ongasekho). I-Albhamu yakhe uhambe eThekwini ngeSonto isithengwe yaphela kwazise uthi ubegaye amakhophi angaphezulu kuka-10 000.