KUNCONYWA UBUCHULE BOMQEQESHI
KUTUSWE ubuchule bukaXolani Mabhida ongumqeqeshi kaBongumusa Mthembu ozifake emabhukwini omlando enqoba iComrades Marathon izolo ngeSonto isuka eCity Hall yaseMgungundlovu yasongwa eMoses Mabhida Stadium, eThekwini.
UMthembu ube ngumsubathi wokuqala omnyama waseNingizimu Afrika ukuvikela isicoco seComrades ngemuva kukaStephen Muzhingi waseZimbabwe odle ubhedu kathathu kulandelana.
UMthembu ube ngumsubathi wokuqala ukushaya intambo eMa- bhida njengoba lo mjaho ubuqala ukuphothulwa kule nkundla.
UMthembu ulandele uBruce Fordyce ngokunqoba lo mjaho iminyaka ilandelana njengoba ewuqale ngo-1981 kuya ku-1988 okwenze wagcina esebizwa ngeComrades King.
USibusiso Ncamane oyimenenja kaMthembu, uthe ubuchule bukaMabhida yibona obubalethele impumelelo kulo mjaho (uMthembu) aqale ukuwunqoba ngo-2014, wawuphinda ngo-2017 njengoba edle ubhedu nanonyaka.
“Kuwumlando kithina ukuthi ingane yomuntu omnyama yaKwaZulu-Natal ivikele isicoco seComrades. Siqale ngoZibandlela (December) ukulungiselela lo mjaho. Besivele sishilo ukuthi sifuna ukuwaqala kusasele izinyanga eziningi amalungiselelo alo mjaho.
“Lo mjaho ubunzima kodwa uMabhida ukwazile ukukhalima uMthembu ukubhekana nabasubathi abanzima abenabo ebhantshini.
"Sijabule futhi ngesikhathi esenziwe nguNkosinathi Duma obegijimela ukusiza uMthembu ngonyaka odlule.
"Kulokhu ubencintisana nabanye abasubathi, futhi waqeda endaweni yeshumi. Sibonga uMabhida ngayo yonke le mpumelelo,” kusho uNcamane.