Ugonyuluka ngeyamasoka unina kaZimdollar
Uthi babulawa 'ukuphapha' labo somabhizinisi
UGONYULUKE ngeyelobolo unina wesilomo somsakazi woKhozi FM, uZimiphi “Zimdollar” Biyela, oganele kwaXulu.
Ngeledlule kusabalale izindaba zokuthi lo msakazi, oshayela uhlelo lukamaskandi, uSigiya Nge ngoma, ngoMgqibelo, oKhozini, ubangwa ngabesilisa ababili abangosomabhizinisi- uMnu Sbongeleni Dlamini noMnu Mzwandile Zondi.
Kuvele ukuthi uMnu Dlamini uselobolile kanti uMnu Mzwandile Zondi usezinhlelweni zokuzishaya zonke kubo kwalo msakazi. ILANGA lihambele kubo kaZimdollar oBuka, eMelmoth, lapho lifice unina, uNkk Thembeni Biyela (65).
Ngesikhathi lifika ILANGA, uNkk Biyela akazange axwaye njengoba egonyuluke ngakho konke okuthinta lo msakazi oyiwele ezinganeni zakhe eziwu-7.
Utshele leli phephanda ukuthi uyayeshwama eyokulotsholwa kwalo msakazi - yilabo somabhizinisi - njengoba azi ukuthi uyinkosikazi yakwaXulu.
“Kungimangalisile ukuzwa ngalaba balisa ekubeni sazi ukuthi uZimiphi uyinkosikazi yomuntu. Ubengakaze asitshele ukuthi kabusekho ubudlelwano phakathi kwakhe noXulu,” kusho uNkk Biyela okhale “ngokuphapha” kwalaba balisa.
“Uma beshela mabangayifaki indaba yokuthi kukhona oseke wavela lapha kithina ngoba kasibazi. Thina izinkomo esisanda kuzemukela ngezendodakazi yethu, uLindi, elama uZimiphi,” kuchaza uNkk Biyela.
UNkk Biyela ukubeke kwacaca ukuthi ngisho ngabe kukhona onezinhloso zokulobola indodakazi yakhe, bona ngeke bazihlanganise nalezo zingxoxo kwazise sekungabakwaXulu okungamele babe yingxenye yazo.
“Ukuthi sisanda kwamukela ilobolo kusiphatha kabi ngoba yinto engekho futhi engenza nomakhelwane basibuke ngenye indlela. Yinto enjani ukuthi singamukela ilobolo lomfazi womuntu?” kubali- sa uNkk Biyela.
Usole kakhulu labo somabhizinisi ngokuthanda ukugqama ngokubanga indodakazi yakhe emaphepheni.
“Uma bona sebenolwazi lokuthi kukhona okungasahambi kahle emshadweni kaZimiphi, mabenze okufanele futhi ezindaweni ezifanele,” kusho yena.
Uze wakhombisa ILANGA esibayeni lapho athe uma bekunezinkomo ezifi- kile bezizogcinwa khona.
“Bukani nje, ngabe niyazibonela nani uma kukhona esike sakwamukela,” kusho uNkk Biyela enanela ngokuthi okunye okumphatha kabi wukuthi useke wezwa ngandlebenye ukuthi abakwaXulu bahlela umhlangano nabo ngalolu daba.
Utshele ILANGA ukuthi bebengakakhulumi noZimdollar ngalolu daba kanti basalinde incazelo ukuthi kwenzekani ngempela ngaye nalaba besilisa asebephumele obala ngaye.
Ethintwa uMnu Zondi okuvele ukuthi usezinhlelweni zokuzishaya zonke kwaZimdollar maduze, wale waphetha ukuphawula. “Ngenxa yokuthi kangilifuni
ILANGA, ngeke ngikwazi ukuphawula kulona. Ziningi izindaba ngizihambisa kuleli phephandaba kodwa lizishaye indiva, ngakho kangizimisele ukusho lutho kuze kube ngihlangana nabaphathi balo, bachaze ukuthi yini inkinga abanayo nami noma nama- driving school (awumkhulumeli wenhlangano yawo),” kusho uMnu Zondi, eqhuba ngokuthi kuningi angakuphawula ngodaba lwakhe noZimdollar kodwa ngeke aphawule kwiLANGA.
UMnu Dlamini utshele ILANGA ukuthi ubengakaloboli kodwa usezinhlelweni zokwenza lokho maduze.
Ebuzwa ukuthi unalo yini ulwazi lokuthi lo msakazi ushadile, wale waphetha ukuphawula ngalokho maqede wavala ucingo.
UZimiphi uyinkosikazi yomuntu.