UKUJABULELE UKUPHOTHULWA KOMBIKO
KAKUSENSUKU zatshwala uphumele emphakathini umbiko wekhomishini ebiholwa ngu-Adv Marumo kaMoerane, mayelana nokubulawa kwabantu KwaZulu-Natal, njengoba usufikile ezandleni zikandunankulu wakulesi sifundazwe, uMnu Wilies Mchunu ( osesithombeni).
Le khomishini isungulwe ngoMfumfu (October) 2016 emuva kokukhula kwesibalo sokubulawa kwabantu kusolwa ukuthi kunenhlese yezepolitiki. Kusukela ngo-2014, isibalo sokubulawa kwabantu KwaZulu-Natal sesikhule sedlulela kwabangu-10.
Okhulumela ihhovisi likandunankulu, uMnu Thami Ngidi, uthe njengoba uMnu Mchunu esewutholile lo mbiko, unezinsuku eziwu-21 ukuba awucubungule bese ewudlulisela kwiportfolio committee esishayamthetho.
Uthe uma sekwenzekile lokho noma i- portfolio committee isiqedile ngalo mbiko, iyowubuyisela kundunankulu. Nakhona lapho uthe uzobe esenikezwa ezinye izinsuku eziwu-21 ukuba usengawuvezela umphakathi.
UMnu Mchunu ucashunwe kwesinye seziteshi zikamabonakude ekuqinisekisa ukuthi uwutholile lo mbiko kanti uveze nokuthi ujabule ngokuba ugcine uphothuliwe.
Uphinde wakuqinisekisa kulesi siteshi sakamabonakude ukuthi ngeke bakuvimbe ukuthi lo mbiko unekwe emphakathini, kodwa lokho kuyokwenzeka uma sekulandelwe yonke imigudu.
“Ngaphambi kokuthi iqale le khomishini, yiwona umphakathi obubuza ukuthi uhulumeni wenzani ngalokhu kubulawa kwabantu.
"Ngakho uma usuphumile, kunabantu abaningi lapha emnyango ababeyizisulu kulokhu kubulawa kwabantu, ngakho siyafuna ukuthi lo mbiko uphumela emphakathini,” kusho yena.